Qazaqstannyń ǵarysh salasynyń qazirgi jaǵdaıy, damý múmkindikteri, jańa aeroǵaryshtyq tehnologııalardy engizý barysy, Baıqońyrdaǵy tarıhı ózgerister «Qazaqstandaǵy ǵarysh kúnderi: Baıqońyr – álemdik ǵarysh besigi» atty halyqaralyq forýmda keńinen talqylandy.
Nur-Sultan qalasynda osymen jetinshi ret uıymdastyrylǵan forým alańynda álemniń 25 elinen kelgen ǵarysh salasynyń 650-den astam sarapshysy bas qosty. Premer-Mınıstr Asqar Mamın qatysqan forýmnyń plenarlyq bóliminde Qazaqstannyń ǵarysh júıesiniń jetistikteri men perspektıvalary áńgime boldy.
Elimizdiń ǵarysh salasyndaǵy basty jańalyqtardyń biri retinde ǵarysh apparattaryn qurastyrý-synaý kesheni qurylysynyń aıaqtalǵany týraly aktige qol qoıylǵanyn aıtýǵa bolady. Sıfrlyq damý, ınnovasııalar jáne aeroǵarysh ónerkásibi mınıstri Asqar Jumaǵalıevtiń aıtýynsha, bul keshen otandyq ǵarysh salasyn sapaly jańa deńgeıge kótermek.
– Búginde Qazaqstanda eki telekommýnıkasııalyq spýtnık bar. Biz osy saladaǵy múmkindikterimizdi odan ári damytýdy kózdeımiz. Keshe ǵana qurastyrý-synaý kesheniniń qurylysy aıaqtaldy, ıaǵnı 2020 jyly biz óz spýtnıgimizdiń jobasyn jasap, óndirýge kirisý arqyly jańa deńgeıge kóterilýdi josparlap otyrmyz. Bul Qazaqstannyń álemdik ǵarysh qaýymdastyǵynyń tolyqqandy múshesi retindegi bastamasy, – dep atap ótti mınıstr.
Asqar Jumaǵalıev forýmǵa qatysqan Qazaqstannyń strategııalyq seriktesterine, atap aıtqanda, «Roskosmos» MK, Airbus, Azııa-Tynyq muhıty ǵarysh yntymaqtastyǵy uıymy, OneWeb, Euroconsult basshylyǵyna alǵysyn bildirip, birlesken jobalardy odan ári júzege asyrýǵa daıyn ekenin jetkizdi.
Osy shara aıasynda Asqar Jumaǵalıev álemdik ǵarysh salasyndaǵy sarapshylarmen ekijaqty kezdesýler ótkizip, tıimdi «ǵaryshtyq» yntymaqtastyq máselelerin talqylady.
Eki kúnge sozylǵan forýmda «Negizgi talqylaýlar «Baıqońyr ǵarysh aılaǵyn damytý», «Ǵaryshtan JDZ jáne spýtnıktik navıgasııa tehnologııalary», «Spýtnıktik baılanystyń bolashaǵy» baǵyttary boıynsha ótti. Alqaly jıyn dúnıejúzilik ǵarysh qyzmetiniń jetistikterimen bólisip, ozyq tájirıbelermen almasýda jáne otandyq ǵarysh salasyn nasıhattaýda biregeı alańǵa aınalǵanyn aıtyp ótken jón.
Forýmǵa mınıstrliktiń strategııalyq seriktesteri – Roskosmos, «Airbus Defence and Space», sondaı-aq otandyq jáne sheteldik uıymdar qatysýda, olardyń ishinde: «M.V.Hrýnıchev atyndaǵy memlekettik ǵaryshtyq ǵylymı-óndiristik ortalyǵy», «M.F.Reshetnev atyndaǵy ASJ» AQ, «Transtelekom»AQ, One Web, SES, «Leica Geosystems, Satrec Initiative», «Eutelsat» BAÁ ǵarysh agenttigi, Ýkraınanyń memlekettik ǵarysh agenttigi, japondyq aeroǵaryshtyq zertteýler agenttigi, THALES ALENIA SPACE kompanııasy jáne taǵy basqalar bar.