Oblys ortalyǵyndaǵy Ortalyq balalar kitaphanasyna jazýshy, jerlesimiz, 95 jyldyǵy atalyp ótip jatqan Múbárak Jamanbalınovtiń esimi berildi. Kezinde onyń shyǵarmashylyǵy jáne balalar ádebıetindegi orny týraly Qadyr Myrza Áli, Muzafar Álimbaev, Saǵı Jıenbaev, Tumanbaı Moldaǵalıev syndy aqyndar da jaqsy baǵa bergen.
M.Jamanbalınov óńirimizdegi Úrlitúp degen jerdiń Táttimbet aýylynda týǵan. Omby pedagogıkalyq ýchılıshesin bitirgen soń, mektepte ustazdyq etken. Keıin oblystyq «Saryarqa samaly» (burynǵy «Qyzyl tý») gazetiniń redaksııasynda qyzmet etti.
Alǵashqy óleńder jınaǵy «Aınabulaq» degen atpen 1956 jyly jaryq kórgen. Jas urpaqty tapqyrlyqqa, batyldyqqa, jigerlilikke, erlikke tárbıeleıtin «Sálem», «Kishkene dostarǵa», «Meniń inim», «Batyr ustaz», «Aqyn bala» sııaqty poema, óleń, jańyltpash, ertegi, jumbaq toptamalary jınaqtap berilgen kitaptary bar.
M.Jamanbalınov – qazaq balalar ádebıetine úles qosqan qalamger. Jazýshy Ǵalymbek Jumatov Múbárak atamyzdy eske alý keshinde qazaq rýhanııatyna eleýli úles qosqanyn aıtyp ótti. О́tken ǵasyrdyń 90-jyldary óńirimizdegi aqyndar aıtysynyń belsendi uıymdastyrýshylarynyń biri bolǵan.
– Múkeń syrshyl aqyn ǵana emes, ulaǵatty ustaz ári jýrnalıst boldy. О́leńderin bala kezimizde jattap óstik. О́ńirimizdiń ólketaný baǵytynda, sondaı-aq Ertis aýdanynyń shejireli tarıhyna qatysty birneshe kitap jazdy. Aqyn Almatydaǵy ádebı ortadan shalǵaı júrip-aq qazaq balalaryna mol ádebı mura qaldyrdy. Aýdandyq «Ertis nury» gazetiniń negizin qalap, sol basylymda kóp jyl qyzmet atqardy jáne oblystyq «Saryarqa samaly» gazetiniń Ertis aýdanyndaǵy menshikti tilshisi boldy, – dedi Ǵ.Jumatov.
Al ardager ustaz, ult janashyry Nurbolat Áýtálipovtiń aıtýynsha, Ertis aýdanynda «Múbáraktaný» oqýlyǵy 2004 jyly №2 orta mektepte oqytyla bastaǵan.
– Ol kezde men mektep dırektory edim. Oqýshylardy ana tilinde sóıletip, qazaqsha oılaý júıesin qalaı qalyptastyrý kerek degen ýaqyt edi. Muǵalimdermen birlese otyryp, Múbárak aqynnyń balalarǵa arnalǵan óleńderinen oqýlyq ázirleýdi bastadyq. S.Toraıǵyrov atyndaǵy ýnıversıtettiń sol kezdegi rektory Erlan Aryn qoldap, 100 dana shyǵaryp berdi. Mekteptegi «Múbárak oqýlary» baıqaýyna kózi tirisinde onyń ózi kelip qatysyp júretin edi, – dep eske alady Nurbolat Áýtálipov.
Qalalyq mádenıet jáne tilderdi damytý bóliminiń uıymdastyrýymen ótken rýhanı is-sharaǵa aqynnyń balalary, nemere-shóbereleri, zııaly qaýym ókilderi men zamandastary qatysty.
PAVLODAR