Pavlodar oblystyq «Qyzyl tý» – qazirgi «Saryarqa samaly» gazetinde jumys istep júrgende «Sosıalıstik Qazaqstan» gazetine ara-tura qysqa habarlar joldap turatyn edim. О́ńirdiń óndiristik ahýaly týraly «Sazyna deıin sary altyn» deıtin kólemdi dúnıe usyndym. Maqala kóp uzamaı jarq etip jarııalandy. Bas redaktor Sherhan Murtaza sol maqalany oqyp, «myna jigitti tabyńdar» dep orynbasary Erjuman Smaıylǵa tapsyrma beripti. Eraǵań qońyraý shaldy. «Sol jaqta júre beresiń be, Almatyǵa kelý oıda joq pa? Sheraǵań seni jumysqa shaqyryp jatyr» dedi.
Mundaı usynys kútpegen jerden bolǵasyn á degende abdyrap qalǵanym ras. Kóp oılanbaı kelisim berdim. Sonymen, 1990 jyldyń kókteminde Almatyǵa qonys aýdaryp, gazettiń ekonomıka bólimine tilshi bolyp ornalastym. Sherhan aǵa jyly qabyldady. Shamaly ýaqyt ótken soń bólimniń aǵa tilshisi, bir jyldan keıin ekonomıka bóliminiń redaktory qyzmetin atqardym. Sheraǵań ol kezde gazettegi birtalaı bólimdi irilendirip, aýyl sharýashylyǵy, mal sharýashylyǵy, egin sharýashylyǵy, áleýmettik máseleler bólimi degenderdiń basyn biriktirdi. Sóıtti de redaksııada ashyq daýyspen, balamaly jolmen saılaý uıymdastyrdy. Bólim redaktory bolǵan adam birden redaksııa alqasyna múshe boldy.
Sheraǵańnyń tikeleı basshylyǵymen ekonomıka máselelerin qaýzap jaza bastadyq. Egemendik kepili bolyp sanalatyn respýblıkalyq altyn-valıýta rezervin qurý, aınalymǵa tól teńgemizdi shyǵarý, jekeshelendirý tárizdi iri sharýalardy kóterdik. Odaqtyq baılanystar, qarjy-qarajat, salyq máseleleri gazet betinde turaqty jazyldy. Áli teńge degen uǵym paıda bolmaı turǵanda ulttyq valıýtamyzdyń qajettiligi týraly máseleni kún tártibine shyǵarǵan edik. Sheraǵań bizge barlyq jaǵynan qoldaý jasady. Jastardy jigerlendirdi.
Ábish Kekilbaıuly redaktor bolǵan tusta da ekonomıka taqyrybyna basa kóńil bólindi. Ol kisi Joǵarǵy Keńeste komıtet tóraǵasy qyzmetin qosa atqardy. Kóbinde parlament qabyrǵasynda bolady. Meılinshe keń, parasatty basshy boldy.
Nurlan Orazalın aǵamyz bas redaktor bolǵan tusta men ol kisiniń ekonomıka jáne kommersııalyq máseleler jónindegi orynbasary boldym. Gazet ishinen «Qazaqstan» degen qarjylyq qosymsha ashtyq. Onda respýblıkamyzda júzege asyrylyp jatqan ekonomıkalyq reformalardyń barysy, turǵyn úıdi kýpondyq jekeshelendirý, óndiristik nysandardy jekeshelendirý máselelerimen qosa jeke qojalyq júrgizý, saıajaıdy ıgerý, jer telimderin durys paıdalaný tóńireginde talaı másele kóterildi.
Gazet redaksııasy janynan «Egemen» degen kompanııa ashyp, onyń quryltaı qujattaryn ázirlep, redaksııa qyzmetkerleriniń materıaldyq jaǵdaıyn jasaýǵa atsalysqan edik. Sonyń arqasynda redaksııaǵa Almatydan bes bólmeli páter, avtobýs, KamAZ, mıkroavtobýs satyp aldyq.
Sol KamAZ-dyń gazet ujymy Astanaǵa qonys aýdarǵanda barlyq júkti tasyp jetkizýge paıdasy tıdi...
Aıta bersek, «Egemendegi» kúnder týraly estelik kóp.
2005 jyly «Egemen Qazaqstanǵa» Bas dırektor bolyp taǵaıyndaldym. Gazette jumys istegen qaı kezeń de esten shyqpaıdy.
Qara shańyraq sanalatyn basylymdy, ujymdaǵy áriptesterimdi 100 jyldyq mereıtoıymen quttyqtaımyn! Egemen elimizben birge jasaı bersin degen tilektemin.
Nurtóre JÚSIP,
Senat depýtaty