Strategııalyq mańyzy zor maqsattarǵa qol jetkizý úshin syrtqy jaǵdaılar da qolaıly bolýy kerek. Tuńǵysh Prezıdentimizdiń salıqaly saıasatynyń arqasynda elimiz halyqaralyq alańda laıyqty oryn aldy. Memleketimiz jahandyq jaǵdaıǵa beıimdeldi dedi Prezıdent Qazaqstanda akkredıttelgen shet elderdiń dıplomatııalyq mıssııalarynyń basshylarymen kezdesýinde.
«2019 jyl halyqaralyq deńgeıdegi kóptegen tabysty kezdesýge de toly boldy. Men syndarly yntymaqtastyqty nyǵaıtý maqsatynda Reseıge, О́zbekstanǵa, Qytaıǵa resmı saparmen bardym. Kelissózder óte nátıjeli ótti» dedi Qasym-Jomart Toqaev.
Memleket basshysy sondaı-aq Shanhaı yntymaqtastyq uıymynyń, Azııadaǵy ózara is-qımyl jáne senim sharalary jónindegi keńestiń, Eýrazııalyq ekonomıkalyq odaqtyń, Táýelsiz memleketter dostastyǵynyń sammıtterine qatysqanyn atap kórsetti.
«Jyl sońyna deıin Qyrǵyzstan men Germanııaǵa saparlarym josparlanyp otyr. Birikken Ulttar Uıymy Bas Assambleıasynyń 74-sessııasyna qatysyp, sóz sóılep, sonyń aıasynda birqatar eldiń basshylarymen kelissózder júrgizdim» dedi Prezıdent.
Qasym-Jomart Toqaev budan bólek bıyl Qazaqstanǵa resmı saparmen Koreıa Respýblıkasy, Grýzııa, Armenııa, Mońǵolııa, Belarýs jáne Shveısarııanyń Memleket jáne Úkimet basshylary kelgenin aıtty.
«Osy saparlar men kezdesýler ózara yqpaldastyqtyń negizgi baǵyttaryn aıqyndaýǵa jaqsy múmkindik týdyrdy» dedi ol.