Qala metrosynyń «Baıqońyr» beketi áp-sátte jastardyń dýmandy daýysymen jańǵyryp, dombyra únine ulasty. Almaty qalasynyń Jastar saıasatyn damytý memlekettik qory «Metropolıten» KMK basshylyǵymen birlesip Qazaqstan Respýblıkasy Tuńǵysh Prezıdenti kúnine arnalǵan fotokórmeni ashty. Kórmede Elbasynyń 2019 jyly jastarmen birge túsken sýretteri de qoıyldy.
«Bıyl – Jastar jyly. Bul memlekettiń jas urpaqqa úlken nazar aýdaryp, jastar bolashaǵyna baǵyttalǵan túrli memlekettik baǵdarlamalardy qabyldap jatqanyn dáleldeıdi. Fotokórmeni uıymdastyrýdaǵy maqsat – otansúıgish rýhty kóterip, óz eliniń bolashaǵyna eńbek etýge úndeý» deıdi uıymdastyrýshylar.
Fotokórmeniń ashylý rásimi kezinde Elbasynyń súıikti ánderi, halyq ánderi shyrqalyp, jastar dobyra, gıtara jáne baıannyń súıemeldeýinde jandy daýyspen kórkem shyǵarmalardy sharyqtatty.
Metronyń «Baıqońyr» beketinde ótip jatqan fotokórmeni qala turǵyndary men qonaqtary 28 qarasha men 5 jeltoqsan kúnderi tamashalaı alady.