Búgin Qyzylorda qalasynyń sol jaǵalaýynan «Orda School» bastaýysh mektebiniń jańa ǵımaraty ashyldy. Bilim oshaǵynyń ashylý saltanatyna oblys ákimi Qýanyshbek Ysqaqov, Parlament Senatynyń depýtattary Baqytjan Jumaǵulov, Nurtóre Júsip, Bilim jáne ǵylym vıse-mınıstri Sholpan Karınova qatysty.
Aımaq basshysy jańa aýdanda boı kótergen 700 oryndyq mektep memlekettik-jekeshelik áriptestik aıasynda salynyp otyrǵanyn aıtyp, óńirdegi osy baǵyttaǵy jumystar nátıjesine toqtaldy.
Qazir Qyzylorda qalasynda 4 jeke mektep jumys isteıdi. Solardyń biri osydan 2 jyl buryn jumysyn bastaǵan «Orda School» bastaýysh mektebi. Alǵash ashylǵan jyly 25 muǵalim 180 oqýshyǵa bilim berse, byltyrǵy oqý jylynda oqýshy sany 320-dan asty, muǵalimder qatary da kóbeıdi. Mekteptiń damý strategııasyna sáıkes aýqymy keńeıip, zamanaýı qural-jabdyqtarmen jabdyqtalǵan 700 oryndyq jańa ǵımaratta bıyl 500-den astam bala bilim alady. Mektep quryltaıshysy – «Bilim shamshyraǵy» JShS.
– Búginde jas urpaqqa sapaly bilim berýge udaıy kóńil bólinip keledi. «Keleshektiń kilti – bilimdi urpaqtyń qolynda» degen qaǵıdat berik qalyptasty. Mine, sonyń dáleli – búgin taǵy bir jańa mekteptiń qurylysy aıaqtalyp, paıdalanýǵa berildi. Bolashaǵymyz balalarymyz úshin olardyń zamanaýı tehnologııamen jabdyqtalǵan jańa ǵımaratta sapaly bilim alýyna barlyq jaǵdaı jasalýda. Bıylǵy jyly tamyz aıynda Nur-Sultan qalasynda ótken respýblıkalyq tamyz konferensııasynda Qazaqstan Respýblıkasynyń Prezıdenti Qasym-Jomart Kemeluly Toqaev bilim salasyndaǵy birqatar ózekti máselelerge toqtalyp, olardy kezeń-kezeńimen sheshýdi tapsyrdy. Sondaı-aq, Memleket basshysy alǵashqy Joldaýynda pedagogtardyń mártebesin kóterý, bilim sapasyn arttyrý, eńbek naryǵyna sapaly mamandar daıarlaý, aýyl mektepteriniń jaǵdaıyn jaqsartý máselelerimen birge bala tárbıesine qatysty naqty basymdyqtardy aıqyndap berdi, – dedi oblys ákimi.
Sharada Senat depýtaty Baqytjan Jumaǵulov qyzylordalyqtardy jańa mekteptiń ashylýymen quttyqtap, Parlament Senatynyń tóraǵasy Darıǵa Nazarbaevanyń quttyqtaýyn oqyp berdi. Bilim jáne ǵylym vıse-mınıstri Sholpan Karınova da lebizin bildirip, Premer-Mınıstrdiń orynbasary Berdibek Saparbaev pen Bilim jáne ǵylym mınıstri Ashat Aımaǵambetovtiń quttyqtaýyn tabystady.
Jańa ǵımaratta 47 synyp kabıneti, robototehnıka kabıneti, 5 sport zaly, bı zaly, basseın, 24 ınteraktıvti taqta, 500 oryndyq ashana bar. Oqýshylar úshin dombyra, bı, qolóner, shahmat, dzıýdo jáne robototehnıka úıirmeleri uıymdastyrylǵan. Elý tórt muǵalim qyzmet isteıtin mektepte oqýshylar jańa baǵdarlama negizinde 3 tilde bilim alady.
Murat JETPISBAEV