Reseılik Pravda.ru ınternet basylymy 100 jyldyq tarıhy bar Egemen Qazaqstan gazeti jaıynda jazdy.
«Ǵasyrlyq toıyn toılap jatqan basylym Qazaqstanda kópke málim. Nur-Sultan qalasynda onyń atyna kóshe de berilgen. Kóshege gazet aty berilgen mysaldar kóp emes. Máselen Máskeýde «Pravda», Permde «Zvezda» kóshesi bar», dep jazdy Pravda.ru.
Sondaı-aq ınternet basylym Egemen Qazaqstan gazetiniń tarıhy Orynbordan bastaý alatynyn jazady.
«Jaqynda ǵana qazaq delegasııasy Orynbordaǵy Lenın kóshesinde ornalasqan tarıhı ǵımaratqa keldi. Munda gazettiń eń alǵashqy sany jaryq kórdi. Ár jyly gazet redaksııasy Orynbor, Qyzylorda, Almaty qalalarynda boldy. Keıinirek 1999 jyly Qazaqstannyń astanasyna kóshirildi», delingen jazbada.
Budan soń, ınternet basylym Orynborda «Egemenniń» 100 jyldyq mereıtoıyna oraı dóńgelek ústel ótkenin jazady. Jıynda Qazaqstannyń Reseıdegi elshiliginiń keńesshi-ýákili Janar Kolbachaeva Qazaqstannyń Reseıdegi Tótenshe jáne О́kiletti Elshisi Imanǵalı Tasmaǵambetovtiń quttyqtaý hatyn oqydy. Elshi quttyqtaýynda bas basylym qaı zamanda da «halyqtyń kózi, qulaǵy hám tili» bolǵanyn aıtady. Redaksııada Bernııaz Kúleev, Smaǵul Sádýaqasov, Júsipbek Aımaýytov, Muhtar Áýezov, Beıimbet Maılın, Sáken Seıfýllın, Turar Rysqulov, Oraz Jandosov, Ǵabıt Músirepov, Sherhan Murtaza, Ábish Kekilbaev syndy belgili tulǵalar eńbek etken. Olar óz zamanynyń kóshbasshysyna aınalǵan basylymnyń damýyna aıryqsha úles qosyp, qaıtalanbas ımıdj qalyptastyrdy.