Egemen Qazaqstan gazetiniń 100 jyldyq mereıtoıy Orynborda toılandy. Bul týraly reseılik nvdaily.ru saıty jazdy.
«Jaqynda ǵana qazaq delegasııasy Orynbordaǵy Lenın kóshesinde ornalasqan tarıhı ǵımaratqa keldi. Munda gazettiń eń alǵashqy sany jaryq kórgen. Mereıtoı aıasynda ǵımaratqa eskertkish taqta ornatý josparlanǵan», delingen jazbada.
Sondaı-aq nvdaily.ru Orynbor men Qazaqstan arasynda tarıhı baılanys baryn jazady.
«N.Krýpskaıa atyndaǵy Orynbor oblystyq ámbebap kitaphanasynda gazettiń mereıtoıyna oraı dóńgelek ústel otyrysy ótti. 1919 jyly gazet alǵash ret «Ushqyn» atymen shyqty. Tarıhı basylym ár jyldary túrli atpen jaryq kórdi. Sonyń ishinde «Sosıalıstik Qazaqstan» atymen basylym jarty ǵasyrǵa jýyq jarııalandy. Gazet ataýy birneshe ret ózgerse de ol qazaq tilindegi eń bedeldi basylym bolyp qala berdi», dep jazdy nvdaily.ru.
Jıynda Qazaqstannyń Reseıdegi elshiliginiń keńesshi-ýákili Janar Kolbachaeva Qazaqstannyń Reseıdegi Tótenshe jáne О́kiletti Elshisi Imanǵalı Tasmaǵambetovtiń quttyqtaý hatyn oqydy. Elshi quttyqtaýynda bas basylym qaı zamanda da «halyqtyń kózi, qulaǵy hám tili» bolǵanyn aıtady. Redaksııada Bernııaz Kúleev, Smaǵul Sádýaqasov, Júsipbek Aımaýytov, Muhtar Áýezov, Beıimbet Maılın, Sáken Seıfýllın, Turar Rysqulov, Oraz Jandosov, Ǵabıt Músirepov, Sherhan Murtaza, Ábish Kekilbaev syndy belgili tulǵalar eńbek etken. Olar óz zamanynyń kóshbasshysyna aınalǵan basylymnyń damýyna aıryqsha úles qosyp, qaıtalanbas ımıdj qalyptastyrdy. Bul tulǵalardyń esimi tek qazaq oqyrmanyna ǵana emes, sondaı-aq reseılik oqyrmandarǵa da jaqsy tanys.
Sondaı-aq gazettiń mereıtoıymen Orynbor oblystyq Mádenıet jáne ishki baılanys mınıstriniń orynbasary Aleksandr Kalının quttyqtady. Ol óz sózinde Reseı men Qazaqstan arasyndaǵy saıası-ekonomıkalyq baılanystyń Orynbordan bastaý alǵanyn sóz etti.
Jıyn sońynda Egemen Qazaqstan gazeti men Orynbor qazaqtary qaýymdastyǵy arasynda yntymaqtastyq jónindegi memorandýmǵa qol qoıyldy.