«Barselona» jáne Argentına quramasynyń shabýylshysy Lıonel Messı France Football basylymy uıymdastyrǵan jyldyń eń úzdik fýtbolshysyna beriletin «Altyn dop» ıegeri atandy.
Daýys berý nátıjesi boıynsha Nıderland quramasy men «Lıverpýl» klýbynyń qorǵaýshysy Vırjıl van Deık ekinshi oryn, Portýgalııa men «Iýventýs» komandasynyń shabýylshysy Krıshtıaný Ronaldý úzdik úshtikti túıindedi. Fýtbolshylardy marapattaý rásimi Parıjdegi (Fransııa) Shatle teatrynda ótip, Messıdi 2018 jylǵy «Altyn dop» ıegeri Horvatııa jáne «Real» klýbynyń jartylaı qorǵaýshysy Lýka Modrıch marapattady.
Messı 2019 jyly «Barselona» klýbymen Ispanııa chempıonatynda top jarsa, Argentına quramasymen Amerıka kýbogynda qola júlde ıelendi. Sondaı-aq ol Ispanııa chempıonaty men Chempıondar lıgasynyń surmergeni atandy. Bıylǵy maýsymda Ulttyq qurama men klýb sapynda jalpy 54 match ótkizip, 46 gol soqqan. 17 ret áriptesterine nátıjeli pas asyrǵan.
32 jastaǵy argentınalyq fýtbolshynyń bul altynshy «Altyn doby». Buǵan deıin ol bul marapatty 2009, 2010, 2011, 2012 jáne 2015 jyldary jeńip alǵan bolatyn.
«Altyn dop – 2019» saýalnamasynyń reıtıngi:
Lıonel Messı (Argentına, «Barselona») Vırjıl van Deık (Nıderland, «Lıverpýl») Krıshtıaný Ronaldý (Portýgalııa, «Iýventýs») Sadıo Mane (Senegal, «Lıverpýl») Mohammed Salah (Mysyr, «Lıverpýl») Kılıan Mbappe (Fransııa, «PSJ») Alısson (Brazılııa, «Lıverpýl») Robert Levandovskı (Polsha, «Bavarııa») Bernardo Sılva (Portýgalııa, «Manchester Sıtı») Rııad Marez (Aljır, «Manchester Sıtı»)Sondaı-aq Parıjdegi marapattaý rásiminde tómendegi atalym boıynsha jeńimpazdardyń da esimderi belgili boldy:
«Jyldyń eń úzdik áıel fýtbolshysy» – Megan Rapıno (AQSh)
«Jyldyń eń úzdik qaqpashysy» (Lev Iаshın syılyǵy) – Alısson Beker (Brazılııa, «Lıverpýl»)
«21 jasqa deıingi eń úzdik jas fýtbolshy» («Copa Trophy») – Matteıs de Lıgt («Aıaks»/«Iýventýs», Nıderland).