Premer-Mınıstr Asqar Mamınniń tóraǵalyǵymen ótken Úkimet otyrysynda salyq jáne kedendik ákimshilendirý máseleleri qaraldy. Bul týraly Premer-Mınıstrdiń baspasóz qyzmeti habarlady.
Bul baǵytta atqarylyp jatqan jumystar týraly Premer-Mınıstrdiń Birinshi orynbasary - Qarjy mınıstri Á. Smaıylov baıandady.
Bıyl 10 aıdyń qorytyndysy boıynsha memlekettik bıýdjetke túsimderdiń ósý qarqyny 14% qurady, bul ótken jylydń osyndaı kezeńimen salystyrǵanda 911 mlrd teńgege artyq.
Birqatar sıfrlyq jobalar iske asyrylýda, onyń ishinde «ASTANA-1», «E-tereze», «Elektrondy shot-faktýralar», «Vırtýaldy qoıma», «Táýekelderdi basqarý júıesi» aqparattyq júıeleri bar, bul prosesti ońtaılandyryp, salyq jáne keden operasııalaryn júrgizýdi jyldamdatyp, ashyqtyǵyn arttyrady.
Memlekettik kiris organdary júıesin sıfrlandyrýdyń nátıjesinde bıýdjetke qosymsha 520 mlrd teńgege jýyq qarjy tústi.
«Múddeli memlekettik organdar bul baǵyttaǵy úılestirilgen jumystardy jalǵastyrýy tıis.Tuńǵysh Prezıdent- Elbasynyń tapsyrmasy boıynsha 1 qańtardan bastap aıyppuldar men ósimpuldardy esepten shyǵarý boıynsha raqymshylyq júrgizilip jatyr. Jeke tulǵalar úshin salyq raqymshylyǵy jalǵasýda», dedi A. Mamın.
Úkimet basshysy memlekettik qoldaý jáne salyq tóleýshilerdiń qaryzdaryn nóldeý nátıjesinde buǵattalǵan bank esepshottary ashylyp, múlikti paıdalanýǵa shekteýler alynyp tastalǵanyn atap ótti, bul kásipkerlik qyzmetti júrgizýdi jalǵastyrýǵa múmkindik beredi.
«Memleket basshysynyń tapsyrmasy boıynsha 2020 jyldyń 1 qańtarynan arnaıy salyq rejımderin qoldanatyn bastap mıkro jáne shaǵyn bıznes sýbektileri tabys salyǵyn tóleýden jáne tekserýlerden 3 jyl merzimge bosatylady», dedi A. Mamın.
Premer-Mınıstr Qarjy mınıstrligine táýekel deńgeıi joǵary baǵyttardy baqylaýǵa basa nazar aýdarýmen bıýdjetke túsimderdiń jasalǵan josparyn sapaly oryndaý boıynsha barlyq qajetti sharalardy qabyldaýdy tapsyrdy.
2020 jyldyń 1 sáýirine deıin aýyl sharýashylyǵy, ishki ister, ádilet mınıstrlikterine, barlyq memlekettik organdarǵa jáne ákimdikterge, «Azamattarǵa arnalǵan úkimet» korporasııasyna derekter bazasyn jandandyrýdy aıaqtaý tapsyryldy.
«Memlekettik kirister organdary men ákimdikter mıkro jáne shaǵyn bıznes sýbektileriniń onlaın baqylaý-kassalyq mashınalardy, pos-termınaldardy qoldaný tolyqtyǵyn, kirister men shyǵystardy jeńildetilgen esepteýdi kezeń-kezeńmen engizýdi qamtamasyz etýiniń mańyzy zor», dedi A. Mamın.