Elordada Qazaqstan Ulttyq Olımpıadalyq komıtetiniń prezıdenti Tımýr Qulybaev pen World Athletics basshysy Sebastıan Koe kezdesti. Bul týraly Olympic.kz habarlady.
Elordaǵa tanymal sport fýnksıoneri, 1980 jylǵy Máskeý jáne 1984 jylǵy Los-Andjeles Olımpıadasynyń jeńimpazy Sebastıan Koe eki kúndik issaparmen keldi. Nur-Sultanǵa sapary barysynda ol birneshe is-sharaǵa qatysty.
Qazaqstan UOK pen World Athletics basshysynyń kezdesýinde otandyq jeńil atletıkanyń damý barysy jáne 2020 jylǵy Olımpıada oıyndaryna daıyndyq kezeńi talqylandy. Sondaı-aq jeńil atletıkalyq nysan qurylysy men jattyqtyrýshylar quramynyń biliktiligin arttyrý jónindegi máseleler talqylandy. Kezdesý barysynda Sebastıan Koe Qazaqstannyń Ortalyq Azııa aımaǵyndaǵy mańyzdy rolge ıe ekenin taǵy bir atap ótti.
«Sizdi Qazaqstanda kórgenimizge qýanyshtymyz. Sizdiń elordaǵa jasaǵan saparyńyz áriptestikti nyǵaıtyp qana qoımaı, elimizdegi jeńil atletıkanyń damýyna erekshe áser etedi. Qazaqstan sportynda jeńil atletıkanyń alar orny bólek. Sońǵy alty Olımpıada oıyndarynda bizdiń atletter birneshe ret jeńis tuǵyryna kóterildi. Eki ret birinshi orynnan kórindi. Sonymen qatar komanda músheleri álem chempıonattarynda kózge túsip júr. Biz jeńil atletıka ardagerleri salyp ótken sara joldy jalǵastyryp kelemiz. 2020 jylǵy Tokıo Olımpıadasyna sportshylarymyz joldama alyp úlgerdi. Aldaǵy irikteý týrnırlerinde lısenzııa sanyn kóbeıte túsýdi kózdep otyrmyz. Bizge qoldaý kórsetip, Qazaqstandy Ortalyq Azııadaǵy kóshbasshylar qataryna qosqanyńyz úshin alǵysymyz sheksiz», - dedi Tımýr Qulybaev.
World Athletics prezıdenti Sebastıan Koe Qazaqstannyń qurlyqtyq jáne álemdik jarystardy qabyldaýǵa áleýeti jetetinin aıtty. Ol rezervtegi sportshylardyń sheberlikterin arttyrý úshin jaǵdaı jasalǵanyna erekshe mán berdi. Eki kún ishinde Sebastıan Koe oqýshylar Saraıyndaǵy jeńil atletıka manejine baryp, Tuńǵysh Prezıdent kúnine oraı uıymdastyrylǵan «Altay Kids Cup III» balalar týrnıriniń qatysýshylaryn marapattady.
Sondaı-aq World Athletics basshysy «Barys-Arena» muz saraıyn aralap, jańadan salynyp jatqan «Jabyq jeńil atletıka kesheniniń» qurylysymen tanysty. Mártebeli qonaqqa Almaty oblysynda ornalasqan «Aq Bulaq» zamanaýı sport bazasy da tanystyryldy.
Sapar sońynda Sebastıan Koe elimizdegi zamanaýı ınfraqurylymdy joǵary baǵalady.
Aıta ketelik, Qazaqstan UOK jáne World Athletics basshylary Halyqaralyq Olımpıada komıtetiniń qoǵammen baılanys jáne sport arqyly áleýmettik damý komıssııasynyń músheleri.