Erteń saǵat 12.00-de elordadaǵy «Alaý» Muz saraıynda konkımen júgirýden Álem Kýbogi kezeńine arnalǵan baspasóz konferensııasy ótedi. Sharaǵa Qazaqstannyń konkımen júgirý Ulttyq federasııasynyń prezıdenti Bolat Jámishev, Ulttyq quramanyń bas jattyqtyrýshysy Dmıtrıı Babenko qatysady. Bul týraly MSM Sport jáne dene shynyqtyrý isteri komıtetiniń baspasóz qyzmeti habarlady.
Osy oraıda Nur-Sultanǵa álemniń 26 memleketinen 200-den astam sportshy keledi. Olardyń qatarynda úsh dúrkin Olımpıada chempıony Martına Sablıkova (Chehııa), Olımpıada oıyndarynyń júldegeri Olga Fatkýlına (Reseı), Olımpıada chempıony jáne júldegeri Iorrıt Bergsma (Gollandııa) jáne basqa da juldyzdar keledi dep kútilýde.
Qazaqstandy atalǵan jarysta jańa jattyqtyrýshy – Dmıtrıı Babenko bastaǵan jańartylǵan quram tanystyrady. Olardyń qatarynda 2013 jylǵy Álem chempıony Denıs Kýzın, jasóspirimder arasynda jeńimpazdar Ekaterına Aıdova jáne Roman Krech, sonymen qatar, bolashaǵynan úlken úmit kúttiretin – Stanıslav Palkın, Dmıtrıı Morozov, Artem Krıkýnovtar bar. Ulttyq qurama atalǵan kezeńge árbir qashyqtyq boıynsha bes sportshy qoıa alady. Bul jattyqtyrýshy quramyna ulttyq quramadaǵy sportshylardy prosesske qosýǵa múmkindik beredi.
Jarys 6-8 jeltoqsan aralyǵynda «Alaý» muz saraıynda ótedi.
Jankúıerlerge kirý tegin.