Ánshi Dımash Qudaıbergen Reseıdiń «Vıktorııa» mýzykalyq premııasynda «Jyl jańalyǵy» jáne «Klassıkalyq mýzykadaǵy jyl ánshisi» nomınasııalary boıynsha jeńiske jetti. Bul týraly dimashnews.com habarlady.
Ár jyldyń sońynda úzdik mýzykanttar, oryndaýshylar, kompozıtorlar, aqyndar, prodıýserler, mýzyka synshylary, jýrnalıster jáne iri medıa holdıngterdiń basshylary «Vıktorııa» syılyǵymen marapattalady. Bıylǵy qatysýshylardyń ishinde qazaqstandyq ánshi Dımash Qudaıbergen de bar.
«Máskeýdegi Memlekettik Kreml saraıynyń sahnasynda syılyq jeńimpazdarynyń esimderi jazylǵan arnaıy konvertter saltanatty jaǵdaıda ashyldy. Olardyń qatarynda qazaqstandyq estrada juldyzy, álem halyqtarynyń súıikti ánshisi Dımash Qudaıbergen de bar», delingen habarlamada.
Reseı Federasııasynyń ulttyq mýzykany qoldaý qorynyń sarapshylarynyń taǵaıyndaýy boıynsha Dımash Qudaıbergen «Jyl jańalyǵy» atalymy boıynsha úzdik dep tanyldy. Buǵan deıin bul nomınasııany 2015 jyly Iýlıanna Karaýlova men Egor Krıd ıelengen bolsa, 2016 jyly Rostıslov Mýdrıskıı alǵan bolatyn.
Sondaı-aq ánshige «Klassıkalyq mýzykadaǵy jyldyń vokalısti» nomınasııasy da buıyrdy.
«Tanymal qazaqstandyq ánshi Dımash Qudaıbergen Reseıdiń «Vıktorııa» mýzykalyq syılyǵynyń «Klassıkalyq mýzykadaǵy jyldyń vokalısti» nomınasııasyn «Olimpico» ánimen utyp aldy. Dımashtyń bul nomınasııadaǵy qarsylastary osal emes. Ol qazirgi opera ánshileri Ildar Abdrazakov, Aıda Garıfýllına, Hıbla Gersmava, Anna Netrebko jáne Olga Peretıatko syndy ónerpazdarmen básekege tústi», delingen habarlamada.
Aıta keteıik, sońǵy birneshe jylda «Klassıkalyq mýzykadaǵy jyldyń vokalısti» ataǵy reseılik jáne avstrııalyq opera juldyzy Anna Netrebkoǵa berilgen.