Almaty oblysynda turǵylyqty jeri boıynsha emhanaǵa tirkelgen adamdardyń úlesi 90 prosentke jetti. Buǵan deıin aımaqta 100 214 turǵynnyń turaqty tirkeýi joq ekeni synǵa alynǵan bolatyn. Qazir bul tizim 35 306 adamǵa deıin qysqaryp, 64 908 turǵyn medısına mekemeleriniń qaraýyna jazyldy.
Turǵyndardyń densaýlyq saqtaý mekemelerine tirkeýge turýy dárigerlik kómek alýdyń máselesin sheshýge yqpal etedi. Ásirese, jańa jyldan bastap iske qosylatyn mindetti áleýmettik – medısınalyq saqtandyrý júıesi arqyly em-dom alý qol jetimdi bolmaq.
- Turǵyndardyń tireýge turý ózderi úshin ońtaıly. Aldaǵy jyldan medısınalyq qyzmet kórsetý jańa erejege saı júredi. Osy jerde em alýshynyń mindetti jarnany tólegeni basty orynǵa shyǵady. Árıne, bul máseleniń áli de jetildiretin tustary bar. Kedergilerdi is barysynda eńseremiz. Sondyqtan tirkelý men jarna tóleý ár adam úshin mindetti bolýy tıis, - deıdi oblystyq densaýlyq saqtaý basqarmasynyń basshysy Baýyrjan Ysqaq.
Aıtpaqshy, «Mindetti áleýmettik-medısınalyq saqtandyrý» júıesi iske qosylǵannan keıin, naýqas tirkelgen emhanaǵa qaralǵan kezde onyń jarna tóleýi mańyzdy orynǵa shyǵady. Bul jerde jalaqy tólenetin qyzmetker úshin mindetti saqtandyrý jarnasyn jumys berýshi tóleıdi. Al ózin-ózi jumyspen qamtyǵan azamattar Salyq kodeksine engizilgen ózgeristerge saı biryńǵaı áleýmettik tólem jasaýy tıis.
Sondaı-aq balalar, júkti áıelder, jumyssyz retinde resmı tirkelgen tulǵalar, 3 jasqa deıin bala tárbıesimen aınalysýshy ata-ana, múgedektik taǵaıyndalǵan jandar, múgedekti kútip,baǵatyn qamqorshy, soǵys ardagerleri, kóp balaly analar jáne taǵy da arnaıy áleýmettik jeńildigi bar adamdar úshin medısınalyq qyzmet kórsetýdi qarjylandyrýdy memleket óz moınyna alady.