El astanasynda ulttyq sport salasyndaǵy úzdikterdiń mereıin kóterýdi maqsat etken dástúrli «Altyn tuǵyr – 2019» syılyǵynyń jeńimpazdaryn marapattaý saltanaty ótti. Báıge, Aýdaryspaq, Kókpar, Jamby atý, teńge ilý, Qazaq kúresi sııaqty ulttyq sport pen Toǵyzqumalaq, Asyq atý jáne taǵy da basqa ulttyq oıyndardan el namysyn asqaqtatyp júrgen darabozdar arnaıy júldeler men syılyqtarǵa ıe boldy.
Saltanatty rásimdi ashqan Ulttyq sport qaýymdastyǵynyń qurmetti prezıdenti Qaırat Satybaldyuly ulttyq sport oıyndaryn nasıhattaýǵa aıryqsha úles qosqan barlyq úzdikter men jankúıerlerge alǵysyn bildirdi.
«Bıyl elimizde ulttyq sport túrlerinen Álem, Azııa chempıonattary men respýblıkalyq týrnırler, festıvaldar jáne taǵy da basqa aýqymdy is-sharalar ótkizildi. Myńdaǵan adam ulttyq sportpen turaqty túrde aınalysady. Elimizdiń barlyq óńirinde ulttyq sport mektepteri men klýbtar jumys isteıdi. Buryn aýyl arasyndaǵy toı-merekelerden ǵana tamashalaıtyn ulttyq sportymyzdyń búginde halyqaralyq deńgeıge kóterilip, álem nazaryn aýdara bastaǵany táýelsizdik pen beıbit kúnniń arqasy» dep atap ótti Qaırat Satybaldyuly.
Nur Otan partııasy Tóraǵasynyń birinshi orynbasary Baýyrjan Baıbek óziniń quttyqtaý sózinde memlekettik til, mádenıet jáne dástúrdi barlyq ulttyq qundylyǵymyzdy saqtaı otyryp qana damyta alatynymyzdy tilge tıek etti.
«Táýelsizdik alǵaly beri Elbasy, Nur Otan partııasynyń Tóraǵasy Nursultan Nazarbaev eń basty qundylyǵymyz – tilimizge, mádenıetimizge, rýhanııatymyzǵa basymdyq berdi. Sonyń arqasynda til mártebesi kóterilip keledi. Endigi ýaqytta jastardy buqaralyq sportqa baýlýymyz qajet. Onyń eń mańyzdysy – ulttyq sport. О́ıtkeni ol – halyqtyń rýhyn kóteretin mańyzdy shara. Kópshilik qoldaǵan halyq partııasy retinde Nur Otan osy bastamany qoldap keledi. Prezıdent Qasym-Jomart Toqaev jaqynda ulttyq sport túrlerin jańǵyrtýǵa qatysty naqty tapsyrmalar berdi. Osyǵan oraı partııanyń saıası doktrınasynda kózdelgen qundylyqtar – qazaq tili, rýhanııatymyz ben dilimiz basym baǵyttarymyzdyń biri bolyp qala beredi» dedi Baýyrjan Baıbek.
Bıylǵy jyldyń kúzinde Nur Otan partııasynyń qoldaýymen, elimizdiń birqatar óńirinde aıtys festıvalderi uıymdastyryldy. Aıtys óneriniń dodasy 16-17 jeltoqsanda Oral qalasynda ótetin «Altyn dombyra» respýblıkalyq festıvalinde óz máresine jetedi.
Aıta keteıik, Nur Otan partııasy janyndaǵy «Mıras» respýblıkalyq qoǵamdyq keńesi músheleriniń bastamasymen memlekettik tildi damytý tetikterin pysyqtaý úshin arnaıy komıssııa qurylǵan bolatyn.