Májiliste túrli jas sanattary boıynsha álemniń birneshe dúrkin chempıony Dınara Sádýaqasovamen bir mezgilde oıyn seansy ótti. Parlament tarıhynda tuńǵysh ret uıymdastyrylyp otyrǵan halyqaralyq týrnırge qazaqstandyq depýtattarmen qatar, Armenııadan, Qyrǵyzstannan, Moldovadan Parlament ókilderi qatysty, dep habarlady osy palatanyń baspasóz qyzmeti.
Jınalǵandar aldynda quttyqtaý sóz sóılegen Májilis Tóraǵasy:
– Biz egemen elimizdiń eń mártebeli, eń uly merekesi táýelsizdik kúni qarsańynda Májiliste halyqaralyq shahmat týrnırin ótkizip otyrmyz. Bul endi elimizdiń abyroıyn kóterip júrgen dańqty sportshylarmen jyl saıyn uıymdastyrlatyn dástúrli sharaǵa aınalady. Al alǵashqy kezdesýdiń álemniń 4 dúrkin chempıony, halyqaralyq grossmeıster Dınara Sádýaqasovanyń qatysýymen shahmattan bastalýy – ol eń aldymen osy tanymdyq oıyn túriniń damýyna úles qosýmen qatar, óskeleń urpaqqa úlgi ete otyryp, jas urpaq arasynda, mektep qabyrǵasynda keńinen nasıhattaýǵa jol ashatyny sózsiz. Sebebi shahmat – sportta da, ómirde de durys qadam jasaýǵa úıretedi, – dedi N. Nyǵmatýlın.
Májilis Tóraǵasy atap ótkendeı, atalǵan týrnırge sheteldik áriptes-depýtattardyń Nur-Sultanǵa arnaıy kelip, qatysýy parlamentaralyq yntymaqtastyqtyń da joǵary deńgeıin kórsetedi.
Shara barysynda Dınara Sádýaqasovaǵa Palata Spıkeri eleýli eńbegi úshin Parlament Májilisiniń atynan arnaıy alǵys hat tabys etti.
Dınara Sádýaqasova 18 taqtada bir mezgilde oıyn seansyn ótkizdi.
О́z kezeginde Dınara Sádýaqasova mereıli mereke qarsańynda Májilis uıymdastyrǵan aýqymdy sharaǵa zor qýanyshpen qatysqanyn jáne onyń egemendikke degen erekshe qurmet retinde baǵalaıtynyn atap ótti.
Oıyn qorytyndysynda birneshe atalym boıynsha jeńimpazdar anyqtaldy. «Úzdik oıyn» boıynsha Májilis depýtattary Amanjan Jamalov, «Úzdik júris» atalymynda Vladıslav Kosarev, «Jeńiske degen jiger» atalymy boıynsha Qýanysh Sultanov marapattaldy.