Batys Qazaqstan oblysynyń Qaztalov aýdanyna qarasty bes aýylǵa tabıǵı gaz qubyry tartylyp, turǵyndar kógildir otynǵa qol jetkizdi. Aıta keteıik, bul aýyldardyń deni okrýg ortalyǵy emes, burynǵy keńshar bólimshesi bolǵan shaǵyn eldimekender.
Táýelsizdik merekesi qarsańynda ot jaǵyp, kúl shyǵarý beınetinen qutylǵan aýyldar – Taldyapan aýyldyq okrýgine qarasty Taldyapan, Qosoba, Qaıshaqudyq, Saryqudyq jáne Qaraózen aýyldyq okrýgine qarasty Serik aýyldary. Jyl sońyna deıin Kómekshi, Kókterek, Orazǵalı, Juldyz aýyldary da kógildir otyn júıesine qosylmaq. Buǵan qosa, Kishkeneshal, Taldyqudyq, Kishitaldyqudyq, Beıisterek aýyldaryna da gaz qubyryn tartý jumystary bastalǵan. Taıaý bolashaqta Kópkútir, Aqqýraı, Haırýsh, Saraljyn, Qyzyltý, Qarakól, Seksenbaev, Mereke, Satybaldy, Ashysaı, Jas, Tanat, Ábish, Elaman, Saraljyn sekildi shaǵyn eldimekenderge kógildir otyn jetkizý úshin jobalyq-smetalyq qujattar daıyn tur eken. Bul jumystar júzeg asqan jaǵdaıda aýdan halqy túgelge jýyq tabıǵı otynmen qamtylady.
- 28 jyl ishinde elimizdiń ekonomıkasy nyǵaıyp, halyqtyń ál-aýqaty artty. Munyń barlyǵy siz ben bizdiń ortaq isterimizdiń nátıjesi, zor eńbektiń arqasy. Qurmetti jerlester, sizderdi ulyq mereke - Qazaqstan Respýblıkasynyń Táýelsizdigi kúnimen shyn júrekten quttyqtaımyn! – dedi turǵyndardyń qýanyshyna ortaqtasqan Qaztalov aýdanynyń ákimi Albert Esalıev.
Aýdanda «О́ńirlerdi damytý» baǵdarlamasy boıynsha respýblıkalyq bıýdjetten bólingen 489 mln. 227 myń teńge qarjyǵa 105,1 shaqyrym jeli iske qosylǵan. Bul jumystardy «ÁlıServıs», «GazGıd» mekemeleri sapaly atqarǵan.
- El Táýelsizdigi merekesi qarsańynda bizdiń alaqandaı aýylymyzǵa tabıǵı gaz kelip, máre-sáre bolyp qýanyp jatyrmyz. Mine, azattyq týy jelbiregen beıbit eldiń erteńi dál osylaı sát saıyn gúdene berýi kerek. Men barlyq jerlesterimdi Qazaqstan Respýblıkasynyń Táýelsizdik kúni merekesimen quttyqtaı otyryp, turmysta tabıǵı gaz otynyn paıdalanýǵa múmkindik jasaǵan jergilikti basshylarǵa aýyl turǵyndary atynan rızashylyǵymdy bildiremin, - deıdi Serik aýylynyń turǵyny Qymbat Abdrahmanova.
Batys Qazaqstan