Beısenbi kúni Eýropa lıgasynyń ekinshi irikteý kezeńiniń ekinshi oıynynda «Aqtóbe» óz alańynda Norvegııanyń «Hedd» klýbyn 2:0 etip utyp, kelesi aınalymǵa shyqty.
Bul match «Aqtóbeniń» Eýropa lıgasynyń irikteý kezeńderindegi basqa oıyndary sııaqty asa tartysty ótti. «Aqtóbe» salǵan betten shabýylǵa shyǵyp, jyldam gol soǵyp aldy. Goldy Sergeı Davydov soqty. Ekinshi taımda da alań ıeleri birneshe ret qaýyrt shabýylǵa shyǵyp, esepti eseleýge múmkindikter aldy. Sondaı sátterdiń birinde Davydov taǵy bir gol soǵyp, esepti 2:0-ge jetkizdi. «Hedd» oıynshylary bolsa, qarymta shabýyl uıymdastyrýǵa tyrysyp, alystan birneshe qaýipti soqqylar jasap turdy. Bul kelesi kezeńge shyǵý úshin matchta norvegter óz alańyndaǵy jeńisterine oraı, qarsylasynyń qaqpasyna bir ǵana dop soǵý qajet edi. Biraq, alań ıeleri olarǵa mundaı múmkindikti bergen joq.
Endi «Aqtóbe» úshinshi kezeńde Islandııa chempıonatynyń kúmis júldegeri «Breıdablık» komandasymen kezdesedi. Birinshi oıyn 1 tamyz kúni Aqtóbede, ekinshi match 8 tamyzda Koýpavogıýr qalasynda ótedi. Eger aqtóbelikter bul komandany da jeńse, Eýropa lıgasynyń toptyq týrnırine top ete túsedi. Al osy kúni Eýropa lıgasynyń ekinshi irikteý kezeńinde oınaǵan taǵy bir komandamyz Pavlodardyń «Ertisi» Bosnııa jáne Gersogovınada «Shırokı Brıeg» klýbynan 0:2 esebimen utylyp qaldy.
Sóıtip, bizdiń elden «Shahter» men «Aqtóbe» ǵana Chempıondar lıgasy men Eýropa lıgasynyń úshinshi kezeńine shyqty. Ekeýiniń de toptyq týrnırge shyǵýǵa múmkindigi bar. Eń bastysy, olarǵa sońǵy oıyndaryndaǵydaı bar kúsh-jigerin salyp, oınasa alynbaıtyn qamal bolmaıdy dep oılaımyz.
Bıylǵy Chempıondar lıgasynyń irikteý kezeńderine 47 el qatysyp jatsa, olardyń ishinde Qazaqstan ázirshe ekinshi orynda keledi. «Shahter» men «Aqtóbe» bizdiń elge taǵy upaı qosty. Birinshi oryndy áli komandalary jeńilmegen Islandııa ıelenip otyr.
Dastan KENJALIN,
«Egemen Qazaqstan».