Biraq jaǵdaıdy ýshyqtyrmaı, jedel sheshim qabyldanýy qajet
Ústimizdegi jyldyń 23 aqpanynda “QazMunaıGaz” BО́” AQ basshylyǵy “О́zenmunaıgaz” О́F-na eńbekaqy tóleýdiń jańa júıesin engizý jóninde sheshim qabyldaǵan bolatyn. Bul júıede buryn berilip kelgen aýdandyq koeffısıentti jáne basqa da ústemelerdi negizgi tarıfke qosý, ıaǵnı Eńbek kodeksiniń talaptaryna sáıkestendirý kózdelgen.
О́kinishke qaraı, osy ózgeristi halyqqa jetkizý, ıaǵnı orta býyn basshylar arqyly túsindirý jumystary óz deńgeıinde júrgizilmegen jáne bul ózgeristi qabyldamaıtyn, ıaǵnı qosymsha shartqa qol qoımaıtyn jumysshylar bir aıdan soń jumystan aırylatyndyǵy eskertilgen. Jergilikti aqparat quraldarynyń aıtqandaryna súıenetin bolsaq, qosymsha shartqa qol qoıýda keıbir kúshteý, eriksiz qol qoıǵyzý faktileri oryn alǵan. Osy jaǵdaı qazirgi jumys berýshi men jumysshylar arasyndaǵy teketireske alyp kelip otyr.
10 naýryzda jaǵdaıǵa baǵa bergen Jańaózen qalalyq soty ereýildi zańsyz dep tanydy jáne sonymen birge, jumys berýshi “QMG” BО́” AQ atyna jeke uıǵarym shyǵaryp, olardyń tarapynan da eńbek zańdylyǵynyń buzylǵandyǵyn atap ótti.
Jergilikti atqarýshy bılik – Mańǵystaý oblysy men Jańaózen qalasy basshylyǵy jaǵdaıdy turaqtandyrý úshin qoldan kelgenniń bárin jasaýda, jumystanýda. Bizder, depýtattar “QazMunaıGaz” ulttyq kompanııasynyń basshylyǵymen kezdesip, olardyń tarapynan da osy kúrdeli jaǵdaıdan shyǵý jóninde tıisti sharalar qarastyrylyp jatqanynan habardarmyz.
“QMG” BО́” AQ basshysynyń sheshimimen joǵarydaǵy eńbekaqy tóleýdiń jańa júıesi týraly habarlamasy óz kúshin joıǵan, bul jóninde munaıshylarǵa habarlanǵan.
Qalyptasqan jaǵdaıǵa keıbir kúshter saıası reńk berýge tyrysqanymen, bul – saıası másele emes, eńbek zańnamasynyń saqtalýy tóńiregindegi kelispeýshilikter. Bul máseleden keıbir saıası uıymdar men jaýapsyz belsendilerdiń saıası upaı jınaýǵa tyrysyp jatqandary baıqalady. Ony jańaózendik munaıshylar durys tarazylaı alatyndyǵyna tolyq senimdimiz.
Sondyqtan Munaı jáne gaz, Eńbek jáne halyqty áleýmettik qorǵaý mınıstrlikteri, “Samuryq-Qazyna” ál-aýqat qory, “QazMunaıGaz” AQ basshylary jaǵdaıdy ýshyqtyrmaı, birlese otyryp tııanaqtap zerdelep, tıisti sheshim qabyldaýy tıis dep esepteımiz jáne soǵan Úkimet yqpal etýi kerek dep bilemiz.
Zeınolla ALShYNBAEV, Májilis depýtaty.