Májilis depýtattary, «Nur Otan» partııasy fraksııasynyń músheleri Aızada Qurmanova, Aıgúl Nurkına jáne Aleksandr Sýslov Pavlodar oblysyna jumys saparmen keldi. Bul týraly Parlament Májilisiniń baspasóz qyzmeti habarlady.
Búgin olar Tereńkól aýdanynyń Peschanoe aýylynyń turǵyndarymen kezdesti. Depýtattarmen kezdesýge eńbek ardagerleri, muǵalimder, medısına qyzmetkerleri, jastar, kásipkerler, sharýa fermer qojalyqtarynyń basshylary, Peschan mehanıkalyq-jóndeý zaýytynyń ókilderi qatysty.
Áńgime barysynda Májilis depýtaty Aızada Qurmanova depýtattar men saılaýshylar arasyndaǵy tikeleı baılanys aımaqtardan obektıvti aqparat alý jáne ony ári qaraı zańnamalyq jumystarda paıdalaný úshin qajet ekenin atap ótti. Depýtattar aýyl turǵyndaryn elimizde júrgizilip jatqan reformalar týraly habardar etti.
Atap aıtqanda, 2020 jyldyń 1 qańtarynan bastap mindetti medısınalyq saqtandyrýdy engizý, kóp balaly otbasylar úshin jańa formattaǵy memlekettik járdemaqylar, jańa AÁK taǵaıyndaý erejesi jáne basqa máseleler qozǵaldy. Sondaı-aq jergilikti ózin-ózi basqarý bıýdjetin qalyptastyrý jáne iske asyrý máseleleri talqylandy. Aýyl turǵyndary sý tazartý qurylysyn qaıta qurý máselesine alańdaýshylyq bildirip, halyq qalaýlylarynan osy máseleni sheshýge kómek kórsetýdi surady.
– Elbasynyń tapsyrmasy boıynsha júzege asyrylatyn «Aýyl – el besigi» baǵdarlamasyn júzege asyrýǵa úlken úmit artamyz, – dep atap ótti depýtat Aızada Qurmanova.
– Naqty qadamdar qabyldanýda, mıllıardtaǵan bıýdjet qarajaty aýyldyq jerlerde ómir súrý sapasyn arttyrýǵa, aýyldyq eldi mekenderdiń áleýmettik jáne ınjenerlik ınfraqurylymyn damytýǵa baǵyttalǵan, - dedi depýtat.
Sondaı-aq depýtattar kóp balaly otbasylarmen kezdesip, aýyldaǵy kóp balaly analardyń kúndelikti tynys-tirshiligimen tanysty. О́z kezeginde kópbalaly analar tabysqa qaramastan jańa memlekettik járdemaqy - ádiletti jáne ýaqtyly qoldaý ekenin atap ótti.