Elbasy men Qazaqstan Respýblıkasy Prezıdentiniń tapsyrmalaryn oryndaý maqsatynda Qazaqstan Respýblıkasynyń Úkimeti men Amerıka Qurama Shtattarynyń Úkimeti arasyndaǵy áýe qatynasy týraly kelisimge qol qoıyldy. Bul týraly Indýstrııa jáne ınfraqurylymdyq damý mınıstrliginiń baspasóz qyzmeti habarlady.
Qazaqstannyń Úkimeti tarapynan kelisimge Qazaqstan Respýblıkasynyń Indýstrııa jáne ınfraqurylymdyq damý mınıstri Beıbit Atamqulov, al Amerıka Qurama Shtattarynyń Úkimeti tarapynan – AQSh-tyń Qazaqstandaǵy Tótenshe jáne О́kiletti Elshisi – Ýılıam H. Mozer qol qoıdy.
Osy Kelisim Halyqaralyq Azamattyq avıasııa uıymynyń (IKAO) áýe kóligin odan ári lıberalızasııalaý jónindegi usynymdaryna sáıkes «Ashyq aspan» qaǵıdattaryn kózdeıtin Qazaqstan Respýblıkasy úshin birinshi qujat bolyp tabylady. Bul Qazaqstan men Amerıka Qurama Shtattary arasynda ushýdy oryndaýdy josparlaıtyn tasymaldaýshylar úshin zor múmkindikter ashady. Kelisimniń aıasynda taraptardyń tasymaldaýshylaryna aýa erkindiginiń «Besinshi dárejesi» berilip, mejeli mekenderdiń jáne jıilikterdiń sany boıynsha shekteý qoıylmaıdy.
Kelisim eki el arasyndaǵy tikeleı turaqty reısterdi oryndaý úshin quqyqtyq bazany qalyptastyryp, sondaı-aq Qazaqstan men Amerıka Qurama Shtattary arasyndaǵy strategııalyq áriptestikti odan ári damytýǵa yqpal etetin bolady.
Eki el arasyndaǵy tikeleı reısterdiń ashylýy saıası, ekonomıkalyq, mádenı ózara qarym-qatynastar men týrızmdi damytýǵa, sondaı-aq «Astana» halyqaralyq qarjy ortalyǵynyń kóliktik qoljetimdiligin arttyrýǵa yqpal etetin bolady.