Parlament Senatynyń depýtattary Nurlan Beknazarov pen Aıgúl Qapbarova jumys babyndaǵy saparmen Shymkent qalasynda bolyp, ákimdikte qala turǵyndaryn qabyldady. Bul týraly Parlament Senatynyń baspasóz qyzmeti habarlady.
Qabyldaý barysynda turǵyn úımen jáne jumyspen qamtý, jer kezegi, zańsyz qurylys jaıy talqylandy. Senatorlar qabyldaýǵa kelgen azamattarǵa úı, jer problemalary boıynsha tek kezekpen, zań júzinde sheshiletinin túsindirdi.
Senatorlar azamattardyń aryzdary nazarda bolatynyn jetkizdi. Depýtattar sol kúni halyqty jumyspen qamtý ortalyǵynda bolyp, onyń jumysymen tanysty, sondaı-aq ataýly áleýmettik kómekke baılanysty aqparattyq-túsindirý jumysyn ótkizdi.
Mamandardyń aıtýynsha, Shymkentte ataýly áleýmettik kómek alýǵa qujat tapsyrý 2020 jyldyń 5 qańtarynda bastaldy. Shymkent qalasy jumyspen qamtý jáne áleýmettik qorǵaý basqarmasynyń qyzmetkerleri 4 aýdan boıynsha AÁK-ti belsendi alýshylardyń alfavıt boıynsha kestesin ázirlegen bolatyn. Bul keste halyq arasynda tıisti túsindirý jumystaryn júrgizý úshin aýdan ákimdikteriniń tıisti bólimderine joldandy.
Depýtattar elimizde ataýly áleýmettik kómek berýdiń qoldanystaǵy júıesin ózgertý týraly zań qabyldanǵanyn, endi memleket birinshi kezekte balalarǵa jáne kóp balaly otbasylarǵa kómektesetini týraly aıtty. Usynylyp otyrǵan jańa ustanymdar: kópbalaly analardy qoldaýdy; jańǵyrtylǵan ataýly áleýmettik kómekti; kepildi áleýmettik kómekti qamtıtyn bolady.