Qurmanǵazy atyndaǵy Qazaq ulttyq konservatorııasynyń májilis zalynda Prezıdent Qasym-Jomart Kemeluly Toqaevtyń Abaı Qunanbaıulynyń 175 jyldyǵyna oraı jarııalanǵan «Abaı jáne XXI ǵasyrdaǵy Qazaqstan» atty maqalasyn talqylaýǵa arnalǵan «Abaı murasy jáne qazirgi zamanǵy Qazaqstan» taqyrybyndaǵy dóńgelek ústel ótti. Bul týraly Mádenıet jáne sport mınıstrliginiń baspasóz qyzmeti habarlady.
Jıynǵa konservatorııa basshylyǵy, professor-oqytýshylyq quramy men zııaly qaýym ókilderi qatysty.
Otyrysty konservatorııa rektory Arman Júdebaev ashyp berdi. «Áleýmettik-gýmanıtarlyq pánder» kafedrasynyń ustazy Qarlyǵash Mátjanova Qasym-Jomart Kemelulynyń ózekti maqalasyn jınalǵan kópshilikke tanystyrdy. Qarlyǵash Mátjanova Memleket basshysynyń maqalasyndaǵy « Ulttyq bolmystyń úlgisi», «Memleket isiniń múddelesi», «Jańa qoǵamnyń janashyry», « Álemdik mádenıettiń tulǵasy», «Torqaly toıdyń taǵylymy» atty taraýlarǵa jeke-jeke toqtalyp, kópshilikke ortaq máselelerdi ortaǵa saldy.
Sonymen qatar jıynda Bazarǵalı Jamanbaev, Tamara Satybaldına, Bazarhan Qosbasarov, Aıjan Berdibaeva, Álııa Sabyrova syndy bilikti ustazdar óz oılaryn aıtty. Jınalǵan kópshilik Prezıdent maqalasynda qozǵaǵan oılaryna, kótergen máselelerine, halyqqa jasaǵan úndeýine, quzyrly organdarǵa qoıǵan naqty tapsyrmalaryna ún qosty.
«Prezıdentimiz Qasym-Jomart Kemeluly bul maqalasynda ózi aıtqandaı, sózden iske kóshý kerekpiz, Abaı atamyzdyń muralary arqyly, óskeleń urpaq boıyna adamgershiliktiń, adaldyqtyń, eńbekqorlyqtyń, parasattylyqtyń dánin egý kerekpiz. Abaıdyń 175 jyldyq mereıtoıyna qoǵamdyq sanany jańǵyrtatyn, elimizdiń damýyna serpin beretin is-shara retinde zor mán berip, naqty ispen kórsetý kerekpiz» dedi jıyn sońynda ujym basshysy Arman Ádilhanuly.