Oblys ortalyǵyndaǵy Abaı atamyzdyń atyn alǵan kóshe qysqa, úzik-úzik, birneshe jerden úzilip baryp, basqa kóshelermen qıylysady. Kósheniń tipti qaı jerden bastalyp, qaı jerden aıaqtalatyny da belgisiz.
Al endi jańadan ashylǵan kóterme bólshek-saýda ortalyǵyna Abaıdyń esimin bergender bylaı dep oılapty: buryn bul kóshe boıy azan-qazan saýdasy qyzǵan bazar bolǵan edi.
Sóıtip Abaı atyndaǵy kósheniń burynǵy saýda-sattyq kóshesine aınalǵan ataǵyn qaıtadan qaıtarǵylary kelipti.
– Jańa ortalyqta azyq-túlikter sapaly, baǵalary qoljetimdi. Jalǵa alýshylarǵa qoıylatyn talap – ónimniń baǵasy men sapasy. Saýda núktesi óndirýshilermen, sharýa qojalyqtarymen, kóterme saýda oryndarymen tikeleı jumys isteıdi. Ortalyqta qaladaǵy áleýmettik bazarlar men jármeńkeler deńgeıinde baǵalar saqtalady. Kóterme saýda men bólshek saýdanyń baǵasy ózgermeı birdeı bolady, – deıdi qalalyq kásipkerlik bóliminiń mamandary.
Qalalyq ákimdik, kásipkerlik bólimi kóterme bólshek-saýda ortalyǵyna uly Abaıdyń esimin bergenderine tipti selt etpeıtin de, uıalmaıtyn da sekildi.
Al kúni keshe qalalyq ákimdikte oblys ortalyǵyn kóriktendirý jumystary týraly máseleler talqylandy.
Abaıdyń 175 jyldyǵyna oraı oblys ortalyǵynda aqynnyń aty berilgen eleýsizdeý qalǵan kóshe tolyq abattandyrylyp, kóriktendirilmek.
– Kóshe boıynda ornalasqan jer úılerdiń syrtqy kelbetine de mán berý kerek. Turǵyndar óz úıleriniń qaqpasy, qorshaýy, shatyrlaryn jóndeýleri qajet. Abaı kóshesin kóriktendirý boıynsha naqty tujyrym jasalsyn, – dedi qala ákimine oblys ákimi Bolat Baqaýov.
Bul tujyrym – Abaıdyń esimin kóterme-bólshek saýda ortalyǵyna bergen qalalyq ákimdikke de oı tastar.
PAVLODAR