Esirtkini jarnamalaıtyndar jazasyz qalmaıdy

Qylmystyq kodekske esirt­kini nasıhattaý nemese jarnamalaý úshin qylmystyq jaýap­kershilik belgileıtin jańa 299-1-bap engizildi. Ol boıynsha úsh jylǵa deıin bas bostandyǵynan aıyrý túrindegi jaza kózdelgen.

Eger osy qylmys toppen, birneshe ret, bilim uıymdarynda nemese adam kóp jınalatyn oryndarda, buqaralyq aqparat quraldaryn nemese elektrondy aqparat resýrstarynyń qyz­mettik jaǵdaıyn paıdalanyp jasalsa, 3 jyldan 6 jylǵa deıin bas bostandyǵynan aıyrý tú­rindegi jaza belgilenedi.

Budan basqa birqatar qylmys­tyq bapqa «elektrondy aqpa­rattyq resýrstardy paıdalaný arqyly» degen jańa saralaý belgisi engizildi.

«Bul sharalar esirtkini taratý­dyń jańa ádisteri úshin jazanyń bolmaı qoımaıtyndyǵyn qamta­masyz etý úshin qajet. Bul dege­nimiz Internet tehnologııalar­dy – saıttardy jáne elektron­dy áleýmettik jelilerdi Ins­tagram, Telegram, Feıs­býk, sondaı-aq elektrondy tó­lem júıe­lerin (Kıvı ámııan, Iаn­deks dengı jáne t.b.) paıdalaný», dep túsindirdi Esirtki qyl­mysyna qarsy is-qımyl depar­tamenti bastyǵynyń orynbasary Nurtaı Ábilmájinov.

Atalǵan qylmystar aýyr já­ne asa aýyr qylmystar sanaty­na jatqyzylǵan. Elektrondy aq­­parattyq resýrstardy paıdalaný arqyly esirtki ótkizý 10­ jyl­dan 15 jylǵa deıin bas bos­­­tandyǵynan aıyrýmen jazala­nady. Elektrondy resýrs­tar ar­qyly esirtki qoldanýǵa kón­di­rý 3 jyldan 8 jylǵa deıin bas bostandyǵynan aıyrýǵa áke­­­ledi. Olardyń kómegimen esirt­­­ki óndirisinde paıdalany­la­tyn zattardyń aınalymy úshin 7­ jyldan 10 jylǵa deıin bas bos­tandyǵynan aıyrýdy kóz­­deı­di.

Esirtki óndirisinde paıdala­nylatyn zattardyń aınalymymen baılanysty burynnan bar qylmystar úshin de jaza kúsheıtildi.