Shymkenttegi «Haıýanattar baǵy» 1980 jyly 29 sáýirde ashylǵan. Alǵashqy jyldary kolleksııada 350 bas 75 haıýanat túri ǵana bolǵan. Bul týraly Shymkent qalasy ákimdiginiń baspasóz qyzmeti habarlady.
2013 jyly qaıta qurý jumystary júrgizilip,«Afrıka» aýmaǵy, ákimshilik ǵımaraty jáne «Taý» ekspozısııasy el ıgiligine berildi. Budan bólek, haıýanattar baǵynyń ishi kógaldanyp, ishki joldar men aıaqjoldar boıyna zoobaq logotıpi beınelengen oryndyqtar men ortalyq ishki jolyndaǵy gúlzarda jaǵalaı ań músinderi ornatyldy.
Sırek kezdesetin jáne joıylyp bara jatqan jan-janýarlardy saqtap, olardy kóbeıtý maqsatynda qurylǵan zoobaqta búgingi tańda túri 200-den asatyn 2000-nan astam janýarlar bar. Munda kelýshilerdiń sany jylyna 500 myńǵa jetedi.
Zoobaqtyń jalpy aýdany – 30 gektar. Onyń ishinde ekspozısııalar 19 gektar jerge ornalastyrylǵan. Mundaǵy janýarlardyń 40 túri Qyzyl kitapqa engen. Zoobaqta tuıaqtylar, jyrtqyshtar, prımattar, qustar, balyqtar, baýyrymen jorǵalaýshylar jáne qosmekendilerdi tamashalaýǵa bolady.
Sondaı-aq munda balyqtyń 70 túrinen,1000-nan astam balyq mekendeıtin akvarıým ornalasqan.