Prezıdent Qasym-Jomart Toqaevtyń 2020 jylǵy 15 qańtardaǵy Jarlyǵymen Qoja Ahmet Iаsaýı atyndaǵy halyqaralyq qazaq-túrik ýnıversıteti erekshe mártebege ıe boldy.
Ýnıversıtet 1992 jyly Elbasy N. Á. Nazarbaevtyń bastamasymen Qazaqstannyń ejelgi qalasy Túrkistanda quryldy jáne búginde Qazaqstandaǵy jalǵyz halyqaralyq ýnıversıtet bolyp tabylady. Ýnıversıtet halyqaralyq korporatıvtik basqarýdyń biregeı júıesine Úkimetaralyq ókiletti keńeske, Senatqa jáne Basqarýshy keńeske ıe. Bilim berý qazaq, túrik, orys jáne aǵylshyn tilderinde júrgiziledi.
Búgingi kúni álemniń birde-bir megapolısi biregeı mazmunmen toltyrylǵan jáne suranysqa saı kásibı mamandar daıarlaýdy damytýdyń baǵyttaryn anyqtaıtyn ǵylymı jáne bilim berý mekemesi bolmasa, ekonomıkalyq ortalyq bola almaıdy.
Qazaqstan Prezıdenti Qasym-Jomart Toqaev bul máselege, ıaǵnı, bilim berý sapasyn arttyrýǵa, onyń halyqaralyq standarttarǵa saı bolýyna, ǵylym men bilimniń ıntegrasııasyna basa nazar aýdaryp otyr. Bul, ásirese, túrki áleminiń mádenı-rýhanı ortalyǵy bolý jáne Túrkistan oblysynyń bilim berý - ǵylymı haby retinde damý mindetteri turǵan Túrkistan qalasy úshin óte mańyzdy.
Ýnıversıtettiń erekshe mártebesi oǵan úlken akademııalyq jáne basqarýshylyq derbestik bere otyryp, Ph.D. fılosofııa doktory men sala boıynsha doktor dárejesin taǵaıyndaýǵa, bilim berý baǵdarlamalarynyń mazmunyn anyqtaýǵa jáne jeke úlgidegi dıplomdardy berýge múmkindik jasaıdy.
Bilim berý grantynyń quny da artatyn bolady. Bul professorlyq-oqytýshylyq quramnyń jalaqysyn arttyrýǵa jáne materıaldyq-tehnıkalyq qamtamasyz etýdi jańartýǵa múmkindik beredi. Bul sharalardyń barlyǵy ýnıversıtetke ǵylymı jáne pedagogıkalyq kadrlardy tartýǵa, osy aımaqtyń damýyna serpin berip, onyń aldyna qoıylǵan maqsattarǵa jetýge yqpal etetin bolady.