Májilis spıkeri Nurlan Nyǵmatýlınniń tóraǵalyǵymen Palatanyń Bıýro otyrysy ótip, aldaǵy jalpy otyrystyń kún tártibi naqtylandy. Bul týraly Parlament Májilisiniń baspasóz qyzmeti habarlady.
Aldaǵy sársenbide Májilis depýtattary birqatar ratıfıkasııalyq zań jobasyn qarap, talqylaıtyn bolady. Olardyń qatarynda Brazılııamen adamdardy ustap berý týraly shartty, sondaı-aq, qylmystyq ister boıynsha ózara quqyqtyq kómek týraly shartty, sonymen birge, sottalǵan adamdardy berý týraly shartty ratıfıkasııalaý týraly zań jobalary bar.
Sondaı-aq aldaǵy jalpy otyrysta sıfrlyq tehnologııalardy retteý máseleleri boıynsha, «2012 jylǵy 3 mamyrda Lıýksembýrgte qol qoıylǵan Hattamamen engizilgen ózgeristerdi eskere otyryp, 2008 jylǵy 26 maýsymda Astanada qol qoıylǵan Qazaqstan Respýblıkasynyń Úkimeti men Lıýksembýrg Uly Gersogtiginiń Úkimeti arasyndaǵy Tabys pen kapıtalǵa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý» týraly konvensııaǵa tolyqtyrý engizý týraly hattamany ratıfıkasııalaý týraly zań jobalaryn jumysqa alady.
Jáne EAEO kedendik aýmaǵyna ákelingen taýarlardy qadaǵalap otyrý tetigi týraly kelisimdi ratıfıkasııalaý týraly, EAEO men Qytaı Halyq Respýblıkasynyń kedendik shekaralary arqyly ótkiziletin halyqaralyq tasymaldyǵy taýarlar men kólik quraldary jóninde aqparat almasý týraly kelisimdi ratıfıkasııalaý týraly zań jobalary boıynsha qorytyndy ázirleý merzimin bekitedi.