BAÁ taq murageri sheıh Muhammed ben Zaıd Ál-Nahaıan eki el arasyndaǵy yntymaqtastyq nyǵaıa beretinin aıtty.
Taq murageri Qazaqstan Prezıdenti Qasym-Jomart Toqaevqa Birikken Arab Ámirlikteri Prezıdenti sheıh Halıfa ıbn Zaıd al-Nahaııannyń sálemin jetkizdi.
«Joǵary mártebeli Prezıdent myrza, eń aldymen, Birikken Arab Ámirlikteri aýmaǵyna qosh keldińiz dep aıtamyn. О́zińizge arnalǵan Birikken Arab Ámirlikteriniń Prezıdenti sheıh Halıfa ıbn Zaıd al-Nahaııannyń ystyq yqylasyn jetkizemin. Ámirlikterdiń basshysy sizdiń saparyńyzǵa úlken tabys tileıdi. Sondaı-aq Ámirlikter Prezıdentiniń jáne ózimniń atymnan jaqyn dosym, joǵary mártebeli Nursultan Nazarbaevqa ystyq yqylasymyzdy jetkizýińizdi suraımyz», - dedi sheıh Muhammed ben Zaıd Ál-Nahaıan.
Budan soń ol Nursultan Nazarbaev pen Ámirlikter sheıhi Halıfa ıbn Zaıd al-Nahaıannyń óte jaqyn qarym-qatynasta ekenin, sonymen qatar, Elbasynyń eki el arasyndaǵy qarym-qatynastardy nyǵaıtýǵa úlken úles qosqanyn atap ótti.
«Qazirgi ýaqytta eki el arasyndaǵy qarym-qatynastar óte joǵary deńgeıde dep aıta alamyz. Biz Birikken Arab Ámirlikteri retinde Qazaqstanmen yqpaldastyqty damytýǵa erekshe mańyz beremiz. Eki el arasyndaǵy yntymaqtastyqtyń barlyq baǵyty men joldary óte úlken. Osy rette 2019 jyly qyrkúıek aıynda Abý-Dabıde ótken Qazaqstan men Ámirlikterdiń úkimetaralyq komıssııanyń nátıjeli jumysyn atap ótkim keledi», - dedi sheıh Muhammed ben Zaıd Ál-Nahaıan.