Qala ákimi Murat Áıtenov jaqynda ǵana iske qosylǵan «Záýre» jylyjaıynyń jumysymen tanysty.
Sharýashylyqtyń daıyn ónimimen tanysqan shahar basshysy klımattyń qolaılylyǵyn paıdalanyp, otandyq jáne sheteldik naryqqa jergilikti kókónisterdi kóptep shyǵaý kerek ekendigin aıtty.
Negizinen qııar ósirýmen aınalysatyn jylyjaıdyń jalpy aýmaǵy 3 gektardy alyp jatyr. Munda «Trıstan» dep atalatyn qııardyń alǵashqy ónimin jınaý birer kúnde bastalady dep kútilýde. Birinshi aınalymnan alynatyn 750 tonna ónimdi soltústik aýmaqtar men Reseıge jóneltý josparlanǵan.
Jalpy ınvestısııa kólemi 900 mln teńgeni qurasa, onyń ishinen 700 mln teńgesi jeńildetilgen nesıemen qamtamasyz etilip, 175 mln teńge memleket tarapynan sýbsıdııalanǵan.
Jylyjaı keshenin salý jobasy 2019 jyly júzege asyrylyp, onda 10 adam turaqty, 20 adam aýyspaly jumys ornymen qamtylǵan. Sonymen qatar, mundaǵy jylyjaı ónimderin bir ortalyqqa jınaý arqyly ózara kooperasııa quryp, deldaldardyń qatysýynsyz Reseıge tikeleı eksporttaý kózdelýde.