Eńbek jáne halyqty áleýmettik qorǵaý mınıstrligi sıfrlyq jobalardy iske asyrý jáne Memlekettik qyzmetterdi elektrondyq jáne proaktıvti formatqa kóshirý arqyly bıýdjet qarajatyn 3,03 mlrd teńgege únemdedi. Bul týraly Eńbek jáne halyqty áleýmettik qorǵaý mınıstrliginiń baspasóz qyzmeti habarlady.
Bul somany esepteý kezinde «Elektrondyq eńbek bırjasy» jáne «Eńbek sharttaryn esepke alýdyń biryńǵaı júıesi» sııaqty jobalar, sondaı-aq elektrondyq formatqa aýystyrylatyn memlekettik qyzmetter eskerildi.
Elektrondyq eńbek bırjasy 2 jyl ishinde jumys berýshiler men jumys izdeýshilerdiń shyǵyndaryn alyp tastaý esebinen 1,6 mlrd teńge kóleminde qarajat únemdeýge múmkinjik berdi. Mysaly, qazir jumys berýshilerge Halyqty jumyspen qamtý ortalyqtaryna (budan ári – HJQO) kelýdiń qajeti joq, bos jumys oryndary bar býma qaǵazdy tapsyrýdyń qajeti joq, endi HJQO shtatynda burynǵydaı osy derekterdi qolmen engizetin birneshe adamnyń bolýy qajet emes.
Elektrondyq eńbek sharttaryn esepke alýdyń biryńǵaı júıesi shartty basyp shyǵarýǵa emes, ony bazada saqtaýǵa múmkindik beredi. Buryn kelisim-shartqa qol qoıý jáne basyp shyǵarý úshin jumys berýshiler aqsha jumsap, olardy saqtaý úshin jeke oryn bólý kerek edi. Pılottyq joba iske qosylǵan sátten bastap 1,5 jyl ishinde Eńbek mınıstri 430 mln teńgeni únemdedi.
Áleýmettik-eńbek salasyn sıfrlandyrýda memlekettik qyzmetterdi elektrondyq jáne proaktıvti formattarǵa kóshirý mańyzdy ról atqarady. Únemdeýdiń negizgi bóligi - barlyq qujattardy qaǵazǵa basyp shyǵarý qajettiliginiń bolmaýy. Bul birqatar áleýmettik jáne eńbek qyzmetterin SMS arqyly, egov.kz portalynda nemese EgovKzBot2.0 Telegram-botynda alýǵa bolatyndyǵyna baılanysty. Osynyń arqasynda qyzmetterdi kórsetýden únemdelgen qarajat 1 mlrd teńgeni qurady.
«Kórip otyrǵanyńyzdaı, eń mańyzdysy sıfrlandyrý azamattardyń ómirin jeńildetip qana qoımaıdy. Ol sondaı-aq prosesterdi ashyq etedi, bıýdjet qarajatyn únemdeýge janama múmkindik beredi. Tek 2019 jyldyń ózinde ekonomıkalyq tıimdilik 2,154 mlrd teńgege jetti», dedi Eńbek jáne halyqty áleýmettik qorǵaý vıse-mınıstri Narıman Muqyshev.
Esterińizge sala keteıik, áleýmettik-eńbek salasyn sıfrlandyrý 2018 jyly bastaldy. Onyń aıasynda «Elektrondyq eńbek bırjasy», «Elektrondyq eńbek sharttaryn esepke alýdyń biryńǵaı júıesi», «Otbasynyń áleýmettik kartasy» jáne basqa da iri jobalar iske asyrylýda.