Elorda ákimi Onkologııalyq ortalyq pen qazaq drama teatrynyń qurylys barysymen tanysty. Bul týraly Nur-Sultan qalasy ákimdiginiń baspasóz qyzmeti habarlady.
Qala ákimi Altaı Kólginov ǵımarattarǵa kommýnıkasııalyq jáne ınjenerlik jelilerdi ýaqytynda jetkizip, aýmaqty abattandyrý qajettigin atap ótti.
Onkoortalyqta obyr aýrýlaryn dıagnostıkalaý men emdeýdiń ozyq tehnologııalary paıdalanylatyn bolady. Jyl saıyn medısınalyq ortalyqta 6 myń pasıent stasıonarlyq kómek, al 30 myńnan astam adam ambýlatorlyq kómek ala alady.
Ákim barǵan ekinshi nysan J. Nájimedenov, A. Baıtursynov jáne 23-15 kósheleriniń qıylysynda ornalasqan qazaq drama teatry. Keshen 800 orynǵa eseptelgen jáne 3 qabattan turady. Qurylysty bıyl aıaqtaý josparlanyp otyr.