Megapolıstiń Indýstrıaldy aımaǵynda óndiristik qýattar úshin alańdar usynylady.
Mundaı kelisimge Almaty ákimi Baqytjan Saǵyntaevtyń Valmont Industries kompanııasynyń jahandyq operasııalar boıynsha vıse-prezıdenti Robert Gıllenmen kezdesýi barysynda qoljetti. Irrıgasııalyq júıelerdi shyǵarý jónindegi ınvestısııalyq jobanyń quny 50 mln dollar.
Kezdesý barysynda kompanııanyń mehanıkalandyrylǵan ırrıgasııalyq mashınalardy shyǵaratyn álemdegi iri óndiris orny ári dıstrıbıýtor ekeni atap ótildi.
Almatynyń óndiristik alań retinde tańdalýy kezdeısoq emes. Logıstıka jáne jobany iske asyrý úshin usynylatyn múmkindikter turǵysynan qaraǵanda qala ınvestorlar úshin tartymdy.
«Sizderdiń Indýstrıaldy aımaqta bolýlaryńyz Almatynyń joǵary ınvestısııalyq tartymdylyǵynyń taǵy bir dáleli jáne qalamyzdaǵy ınvestısııalyq óndiriske qarjy salý boıynsha ózge halyqaralyq kompanııalarǵa úlgi bolyp tabylady», - dep atap ótti Baqytjan Saǵyntaev.
Búgingi kúni Almatynyń Indýstrıaldy aımaǵynda 43 kompanııa jobalardy iske asyrýǵa kirisip ketti, olardyń 9-y sheteldik kompanııanyń qatysýymen júrýde. Investısııanyń jalpy somasy - 181 mlrd teńge. Munda 6,7 myńnan astam jumys orny qurylatyn bolady.
8 kásiporyn paıdalanýǵa berildi, ınvestısııanyń jalpy somasy - 26,6 mlrd teńge. 985 jumys orny ashylatyn bolady.
Aǵymdaǵy jyly quny 24,1 mlrd teńge bolatyn 14 jobany iske asyrý, 1369 jumys ornyn qurý josparlanǵan.