Túrkistan oblysynda ótken jyldyń 1 qańtarynan 59 qyzmet túri boıynsha tabıǵı monopolııa sýbektileriniń tarıfteri tómendetilgen bolatyn. Nátıjesinde turǵyndardyń kommýnaldyq qyzmetke tóleıtin qarajatyn únemdeý shamamen 3 mlrd teńgeden asqan. Bul týraly óńirlik kommýnıkasııalar qyzmetinde ótken brıfıngte Tabıǵı monopolııalardy retteý komıtetiniń Túrkistan oblysy boıynsha departamenti basshysynyń mindetin atqarýshy Qymbat Beısenov málimdedi.
Bıylǵy 1 qańtardaǵy jaǵdaı boıynsha oblysta 116 qyzmet túrimen aınalysatyn 93 tabıǵı monopolııa sýbektisi engizilgen. «Búgingi tańda oblys boıynsha jylýmen jabdyqtaýshy 6 memlekettik kommýnaldy kásiporyn jumys atqarýda. Birinshi qańtardan bastap jylýmen jabdyqtaý tarıfteri orta eseppen 3-17 % aralyǵynda tómendedi. Sýmen jabdyqtaý tarıfteri orta eseppen oblysta 0,1-2% arzandaǵan. Al elektr energııasymen jabdyqtaý qyzmeti boıynsha 2020 jyldyń 1 qańtarynan bastap tasymaldaý tarıfi 6,64 teńgeden 7 teńgege kóterildi. Tabıǵı gazben jabdyqtaý qyzmeti boıynsha tasymaldaý tarıfi ózgerissiz qaldyryldy» dedi Qymbat Beısenov.
Sondaı-aq basshynyń mindetin atqarýshy tabıǵı monopolııa sýbektileriniń aldyńǵy jylǵy tarıftik smetalarynyń oryndalýy esebine jasalǵan taldaýlardyń qorytyndysymen jalpy sommasy 1 mlrd 292 mln 948,4 myń teńge kóleminde ótemdik tarıfter bekitilip, halyqqa tómendetilgen tarıfpen qaıtarylǵanyn málim etti.
Túrkistan oblysy