Qazaq tilindegi medıa máselesi talqylandy

Jyl saıyn forýmda medıa salasyndaǵy úzdik sarapshylar, jýrnalıster, veb-saıt­tardyń bas redaktorlary kásibı tájirıbesimen bó­li­sip, saladaǵy ózekti máse­le­lerdi talqylaıdy. Bıyl qa­ty­sýshylar qazaq tilindegi onlaın kontentten aqsha tabý, Qazaqstan medıa naryǵyn damytý máselelerin ortaǵa saldy. Forýmdy elimizdegi AQSh elshiligi men Qazaqstan baspasóz klýby uıymdastyrdy. Shara qonaqtary National Geographic Qazaqstan usynǵan Qazaqstan men AQSh taqyrybynda fotosýretter kórmesin tamashalaýǵa múmkindik aldy.

AQSh-tyń Qazaqstandaǵy Tótenshe jáne ókiletti elshisi Ýılıam H.Mozer alǵy sózinde búgingi qazaq tildi medıaǵa degen suranys artyp kele jatqanyn atap ótti. «Qazforum osydan 4 jyl buryn qazaq tilinde habar taratatyn onlaın medıa ókilderiniń kásibı alańyn qa­lyp­tastyrý maqsatynda bas­­tal­dy. Búgin qazaq tiliniń qol­da­ný aıasy keńip keledi. 4 mln adam medıany turaqty qazaq tilinde tutynady eken, 500-den astam medıa bar. Alaıda qazaq tilindegi medıa úshin jarnama tartý máselesi áli de qıyn bolyp tur. Bul alańda ártúrli medıa ókilderi búgingi jahandyq ózgeriste paıda bolǵan medıa salasyndaǵy basty syn-qaterlerdi sheshý jolyn tabýǵa tyrysady», dedi Ýılıam H. Mozer. AQSh elshisi búgingi qazaqtildi medıa ǵana emes, jalpy álemdik medıa jalǵan aqparat máselesimen betpe-bet kelip otyrǵanyn aıtty.

Qazforum 2020 medıa­fo­rý­my­nyń plenarlyq otyrysynda «Qazaq qoǵamyna qandaı medıa qajet?» taqyryby kóterildi. Belgili saıasattanýshylar Aıdos Sarym jáne Samat Nurtaza, Tarlan.kz veb-saıtynyń bas redaktory Nurǵalı Nurtaı, Nege.kz veb-saıtynyń bas redaktory Erik Rahym, «Aıqyn» gazetiniń bas redaktory Nurmuhamed Baıǵara elimizdegi qazaqtildi buqaralyq aqparat quraldaryna naryqtandyrý úderisteri men sońǵy saıası ózgeristerdiń áserin talqylady. Qatysýshylar In­ter­net pen jahandyq sıfrlandyrý ǵasyrynda jańa medıa men dástúrli BAQ-tyń suranysy týraly suraqtarǵa jaýap berýge tyrysty. «Aıqyn» gazetiniń bas redaktory Nurmuhamed Baıǵaranyń aıtýynsha, bú­gin­gi baspasózde kóterilip jat­qan taqyryptar aıasy keń. Jýr­na­lıster sıfrlandyrý, IT, digital salasyn tereń zerttep, oqyr­man­ǵa sapaly saraptamalyq maqalalar usynyp júr. Sondaı-aq ol baspasózdiń elektrondy BAQ-pen básekege tús­ýi úshin dástúrli joldarmen qatar, sońǵy tehnologııalar­dy meńgerip, aýdıtorııa suranysyna saı formatta aqparat taratýdy úırengeni abzal ekenin basa aıtty.

Sondaı-aq jetekshi medıa sarapshylardyń qatysýymen sheberlik sabaqtary men trenıngter ótti. Qazaq tilinde You Tube áleýmettik jelisinde sapaly ári tabysty joba júr­gi­zý keńinen talqylanyp, qa­ty­sý­shylar qyzyǵýshylyq ta­nyt­­qan taqyryptardyń biri boldy. Sharaǵa 200-den astam adam qatysty. Elordalyq qo­naq­tarmen qatar, elimizdiń óńir­lerinen kelgen mamandar aımaqtyq medıa keńistikte sapaly ári mazmundy habarlar sanyn arttyrý týraly pikir almasyp, basqa oblys, aýdandaǵy áriptesterimen baılanys ornatty.