Qyzylaǵashtyqtardyń tasqynnan keıingi basynan ótkergeni jaıly qaýeset, alyp-qashpa áńgime tolastar emes. Alǵashqy kúnnen turǵyndardyń basyna túsken aýyrtpalyqty kózben kórip, búgingi qolǵa alynǵan jumystardy oı eleginen ótkizsek, sabyrǵa kelip, kópshiliktiń nıet-peıiline rıza bolasyń. Memleket basshysynyń tapsyrmasymen tııanaǵy keltirilgen jumystar birden kózge túsedi. Keshe atalǵan eldi mekendegi alǵash qazyǵy qaǵylǵan úıdiń shatyry kóterilgenine kýá boldyq. Úıdi “Almaty qurylys” uıymy salsa, mundaǵy eńbek qaýyrt qımylǵa ulasqan.
Búgingi kúni jurttyń basynan keshirgen qıyndyǵynan góri eldi mekenniń erteńi, aldaǵy ómirleriniń qalaı qalyptasatyny oılandyrady. Ol qurylys jumystarynyń sapaly ári merziminde júrgizilýi men paıdalanýǵa berilýine tikeleı baılanysty. Kún saıyn jedel jıyndy aýyldy tazalaý men qurylys jumystarynyń barysymen tanysýdan bastaıtyn oblys ákimi Serik Úmbetov osy máselelerdiń tııanaǵyn keltirýge kúsh-múmkindikti jumyldyrýdy tapsyryp keledi. Jumys birshama júıelengen. “Almaty qurylys”, “Aýyl qurylysy” kompanııalary bekitilgen turǵyn úılerdiń qabyrǵalaryn kóterse, jumystyń jedel jalǵasýy úshin beton zaýyty merdigerlerdiń tapsyrysyna sáıkes eki maýsymda istep, ár kósheden úılerdiń sulbalary kórinip qaldy.
Halyqtyń qıyndyqty umytýy úshin baspanany tez salyp, qonystandyrý. Ol úshin qaltaly azamattardyń kómegi qajet. Dúısenbi kúni Qyzylaǵashqa arnaıy kelgen “BN-Invest” kompanııasynyń basshysy Bolat Nazarbaev aýyldyń batysyndaǵy jańa kóshege óz qarjysyna 10 úı salyp beretinin jetkizip, kópshilikti taǵy bir qýantty.
– Qyzylaǵashtaǵy jaǵdaıdy estigender kómekterin aıamaýda. Bul oryndy. Halqymyz “Jaqsylyq pen jamandyq egiz” degen. Turǵyndardyń basyndaǵy aýyrtpalyqty kóterý maqsatynda osy kósheden 10 úıdiń qurylysyn bastap, 2,5-3 aı merzimde paıdalanýǵa beremiz, dedi Bolat Ábishuly jýrnalısterge bergen suhbatynda. Otbasylary ekige bólinip, balalary qalada, azamattary qurylys jumystaryna tartylǵandarǵa bul úlken demeý deýge bolady.
Úkimet tarapynan da zardap shekkenderge qajetti jan-jaqty kómek jasalýda. Jalpy el bolyp, halyqtyń qaıǵysyn jeńildetýge jumylǵan. Merdigerlik uıymdar qarjy tabýdy ǵana oılap, qurylystyń sapasyna mán bermegenderine esh keshirim bolmaıtynyn oblys ákimi jıynda shegelep aıtyp, eskertip keledi. Belgilengen merzimde qurylysty salýǵa qabiletsizderdiń ornyn myqtylary basatyny da túsindirilýde.
“Almaty qurylys” aýyldaǵy 32 turǵyn úıdi salýdy mindettense, mundaǵy qajetti tehnıka men kásibı mamandar, sáýletshiler qımyly shıraq ekeni ańǵarylady. Búginde qurylys jumystaryna 2000 adam, 289 tehnıka tartylǵany osynyń dáleli. Jumystan aýyl turǵyndary da shet qalmaı, 250 adam eńbekke tartylypty. Belgilengen merzimde bútin bir aýyldy qaıta turǵyzý úshin qurylysshylar qataryn kóbeıtý qajettigi ortaǵa salynsa, qurylys materıaldary tolassyz tasymaldanyp, jol boıyndaǵy aýyr júk kólikteri ári aǵylýda.
Turǵyndardyń tasqynnan aman qalǵan úılerin buzbaı, kúrdeli jóndeýden ótkizý jaıly ótinishteri de sheshimin tapqan. Osylaısha bastapqyda 467 úı qaıta salynady dep sheshilse, búgingi kúni 17 úı zilzalaǵa qarsy kúsheıtilip, tolyq jóndeýden ótkiziledi dep sheshildi. Oblys basshysy mektep úıi men balabaqshany qalpyna keltirýge jumsalatyn qarjynyń qymbattyǵyn da synǵa aldy. Bas paıdasynan góri, bardyń baǵasyn bilip, halyqtyń jaǵdaıyn jasaý qajettigin jetkizdi.
Aýyldyń shyǵysynan oryn alatyn saıabaqtaǵy eskertkish jobasyn jasaý, jol men kósheni qalpyna keltirýge qatysty jumystardy júıeleý máselelerine de nazar aýdaryldy.
Sý tasqynynan zardap shekkenderge járdemaqy aýdarý jumysy jalǵasyp, “Qazposhta” aksıonerlik qoǵamy arqyly buǵan deıin 2625 esep-shot ashylsa, oǵan 21 mln. 443 myń teńge aýdarylypty. Sońǵy málimet boıynsha Qyzylaǵashaǵy tasqynnan bolǵan jaǵdaıdy qalpyna keltirý qoryna 2 mlrd. 466 mln. teńge qarjylaı kómek túsken. Elimizdiń túpkir-túpkirinen kelip jatqan qaıyrymdylyq sharalary áli de jalǵasýda. Qarqyn alǵan qurylys jumystarynyń dálelindeı kóshedegi úılerdiń qabyrǵalary bıiktep, shańyraǵy kóterilýde.
Kúmisjan BAIJAN, Almaty oblysy.