Bıyl álemdik deńgeıdegi danyshpan Abaı Qunanbaıulynyń týǵanyna175 jyl tolýyna oraı Rýdnyı qalasyndaǵy kitaphanalar men murajaılarda, oqý oryndarynda túrli sharalar bastalyp ketti.
Qalalyq «TVS» telearnasy men «Magnetıt» aptalyǵy arnaıy aıdar ashyp, ulttyq bolmystyń úlgisi – Abaıdyń mol murasyn nasıhattaýshylarǵa jaqsy jaǵdaı jasap otyr. Bul isten qalalyq ardagerler keńesi de syrt qalmady. Onyń músheleri Qasymqaıyr Dúısenbaev, Qabdolla qajy Ahmetjanov, Súndet Moldashevtar júrekten shyqqan jyrlaryn oqysa, Jaqsylyq Kákenov, Lılııa Pentıýhova, Nına Gerasımova, Shamshııa Qaıyrkenova, Láılá Qapanova, Rysbıke Súımekovalar Abaıdyń óleńderi men qarasózderin jatqa aıtyp, ánderin shyrqady. «Bizdiń búgingi qoǵamda aqsaqaldardyń alǵa shyǵyp, Abaıdy ardaqtaýy, onyń rýhanı murasyn dáripteýi óte qýanyshty. Aldaǵy ýaqytta da ardager aqsaqaldarymyzdyń Abaı ónegesin, shyǵarmalaryn jas urpaqqa barynsha nasıhattaýǵa úles qosa beredi» dedi mundaı ıgilikti istiń basy-qasynda júrgen qalalyq ardagerler keńesiniń tóraǵasy Sálimgereı Bekseıitov.
Sondaı-aq, «Asyl sózdi izdeseń, Abaıdy oqy, erinbe. Adamdyqty kózdeseń, jattap toqy kóńilge!» dep Sultanmahmut Toraıǵyrov jyrlaǵandaı, qaladaǵy jıyrma bir mektep oqýshylary jáne balabaqsha búldirshinderiniń qatysýymen dástúrli «Abaı oqýlary» baıqaýy bastaldy. Qalalyq telearna men basylym endigi kezekte qalyń oqyrman men kóptegen kórermenderdi osy baıqaýdyń qatysýshylarymen jaqyn tanystyrýdy da oılastyryp otyr. Abaıdyń mereıtoıyna oraı ótkiziletin túrli is-sharalardyń barlyǵy da kenshiler qalasy turǵyndarynyń, ásirese jastardyń oı-órisin damytyp, bilim kókjıegin keńeıtýine, rýhanı serpilis bererine árkimniń de senimi mol.
RÝDNYI