Elimizdiń birqatar qalasynda aýa almasýy nasharlap, qolaısyz meteojaǵdaı qalyptasqan kúnderi avtokólik qozǵalysyna ýaqytsha shekteý engizý josparlanyp otyr. Mundaı kezde kóshege shyǵýǵa kóliktiń memlekettik tirkeý nómirindegi sońǵy sanǵa qaraı ǵana, ıaǵnı jup nemese taq kúnderi ruqsat berilýi múmkin, dep jazady Egemen.kz.
Bul shara 2026-2028 jyldarǵa arnalǵan atmosferalyq aýany qorǵaý qaǵıdalaryn ázirleý aıasynda qarastyrylyp otyr. Ákimdikterge tıisti tapsyrmany Ekologııa jáne tabıǵı resýrstar mınıstrligi bergen. Vedomstvo dereginshe, 2025 jyly «Qazgıdromet» málimetteri boıynsha elimizdiń 11 qalasynda aýa lastanýy joǵary deńgeıde tirkelgen.
Ekologııalyq jaǵdaıy kúrdeli qalalardyń qatarynda Almaty, О́skemen, Qaraǵandy, Temirtaý jáne Aqtóbe bar. Bul qalalarda jelsiz kúnderi tútin taramaıdy. Aýa sapasy kúrt tómendeıdi.
Tıimdi sheshimderdi tabý úshin mınıstrlik ókilderi Qytaıǵa baryp, Beıjiń qalasyndaǵy tájirıbemen tanysty. Onda aýa sapasyn jaqsartý úshin birneshe shara qatar qoldanylady. Kólik qozǵalysy retteledi. Qoǵamdyq kólik jańartylady. Qala aýmaǵy ekologııalyq aımaqtarǵa bólinedi.
Oqı otyryńyz: Almatyda tútini býdaqtaǵan avtokólikterdi tekserý kúsheıdi
Sapar sońynda ákimdikterge jańa erejeler ázirleý tapsyryldy. Bul erejeler naqty shekteýlerdi qamtıdy. Sonyń biri – «jup kún – taq kún» tártibi. Qolaısyz meteojaǵdaı jarııalanǵan kúnderi kólikter nómirine qaraı kóshege shyǵady. Memlekettik nómiriniń sońǵy sany jup kólikter jup kúnderi ǵana qozǵalady. Taq nómirli kólikter taq kúnderi ǵana shyǵa alady. Bul bir kúnde jolǵa shyǵatyn kólik sanyn azaıtady.
Sonymen birge qoǵamdyq kólik pen taksıdi elektr qýatyna jáne gazǵa kóshirý josparlanǵan. Qalalar ekologııalyq aımaqtarǵa bólinedi. Keı aýmaqtarǵa ekologııalyq klasy tómen kólikter kirmeýi múmkin.
Oqı otyryńyz: Tútinge tunshyqqan shahar: Megapolıstiń ekologııalyq ahýaly qashan túzeledi?
Aıta keteıik, mundaı erejeler Almaty qalasynda 2025 jylǵy 30 jeltoqsanda bekitilgen. Qalada shyǵaryndylary az aımaqtar belgileý kózdelgen. Ekologııalyq talapqa saı kelmeıtin kólikterge qosymsha shekteýler engizilýi múmkin. Tútini kóp eski kólikterdi satyp alý tetigi de qarastyrylyp jatyr.
Oqı otyryńyz: Soltústik Qazaqstanda eki áıel tútinniń ıisinen tunshyǵyp qala jazdady
Mamandardyń aıtýynsha, negizgi maqsat – júrgizýshilerdi jazalaý emes, qolaısyz meteojaǵdaı kezinde kólik sanyn azaıtý. Aýanyń sapasyn jaqsartý. Qala turǵyndarynyń densaýlyǵyn qorǵaý.