17 mamyr kúni Qazaqstanda telekommýnıkasııa jelileriniń turaqty jumysyn qamtamasyz etip, zamanaýı qoǵam ómiriniń ajyramas bóligine aınalǵan baılanys salasynda eńbek etetin mamandardyń kásibı merekesi – Baılanys qyzmetkerleri kúni atap ótiledi. Ataýly kún qarsańynda úzdik qyzmetkerler memlekettik jáne salalyq nagradalarmen marapattaldy, dep habarlaıdy Egemen.kz.
Bul mereke Halyqaralyq elektr baılanysy odaǵy (HEO) bekitken Dúnıejúzilik elektr baılanysy jáne aqparattyq qoǵam kúnine oraılastyrylǵan.
«Búginde dál osy tehnıkalyq mamandar jelilik ınfraqurylymnyń úzdiksiz jumysyn, telekommýnıkasııalyq tehnologııalardyń damýyn jáne eldi mekenderdi zamanaýı baılanys qyzmetterimen qamtamasyz etýdi júzege asyryp otyr. Olardyń kásibıligi baılanys sapasyna, ınternettiń qoljetimdiligine jáne eldiń sıfrlyq ınfraqurylymynyń turaqtylyǵyna tikeleı áser etedi», dedi Jasandy ıntellekt jáne sıfrlyq damý vıse-mınıstri Dosjan Musalıev.
Qazirgi tańda Qazaqstannyń telekommýnıkasııa salasynda shamamen 35 myń adam eńbek etedi. Sońǵy jyldary elimizde baılanys ınfraqurylymyn damytý, mobıldi ınternet qamtý aıasyn keńeıtý jáne aýyldyq eldi mekenderdi joǵary jyldamdyqty ınternetpen qamtamasyz etý baǵytynda aýqymdy jumystar atqaryldy.
Telekommýnıkasııa jabdyqtaryn shyǵarady
Qazaqstan baılanys sapasy kórsetkishteri boıynsha da turaqty ósim kórsetip keledi. Mobıldi ınternettiń ortasha jyldamdyǵy 94,54 Mbıt/s-qa jetti. Infraqurylymdy jańǵyrtý aıasynda aýyldyq óńirler kezeń-kezeńimen eskirgen 3G jelisinen zamanaýı 4G standartyna kóshirilip jatyr. Al 5G tehnologııasy búginde megapolısterdi, oblys ortalyqtaryn, sondaı-aq Alataý men Qorǵas qalalaryn qosa alǵanda, 20-dan astam qalada engizildi.
Kásibı mereke qarsańynda Astanada telekommýnıkasııa salasynyń tehnıkalyq mamandary arasynda jyl saıynǵy salalyq baıqaý ótti. Bıyl jarysqa Qazaqstannyń 9 telekommýnıkasııalyq kompanııasynyń mamandary qatysty. Qatysýshylar turaqty ári sapaly baılanysty qamtamasyz etýdegi negizgi baǵyttardyń biri sanalatyn talshyqty-optıkalyq baılanys jelilerin (TOBJ) dánekerleý boıynsha tájirıbelik daǵdylaryn kórsetti.
Baıqaý qorytyndysy boıynsha birinshi oryndy «Qazaqtelekom» AQ qyzmetkerleri, ekinshi oryndy «Transtelekom» AQ, úshinshi oryndy «KaR-Tel» JShS ıelendi.
Merekelik is-sharalar telekommýnıkasııa salasynyń damýyna úles qosqan qyzmetkerlerdi saltanatty marapattaý rásimimen aıaqtaldy. Úzdik mamandarǵa memlekettik jáne salalyq nagradalar, sonyń ishinde «Qurmet», «Eńbek ardageri» jáne «Baılanys salasynyń úzdigi» ataqtary tabystaldy.
Baılanys qyzmetkerleri kúnin atap ótý sala mamandarynyń sıfrlyq ekonomıkany damytýǵa, zamanaýı tehnologııalardy engizýge jáne Qazaqstan azamattarynyń ómir sapasyn arttyrýǵa qosqan úlesin aıshyqtaı túsedi.