Rejısser Rústem Ábdirashovtiń «Qazaq handyǵy. Altyn taq» tarıhı fılmi 2020 jylǵy aqpannyń 26 men 4 naýryz aralyǵynda Bangalorde (Karnataka shtaty, Úndistan) ótetin HII-Bengaluru international film festival kınofestıvaliniń Asian Cinema Competition baǵdarlamasyna qatysady.
Karnataka shtaty úkimetiniń tapsyrysy boıynsha Chalanachitra akademııasy uıymdastyrǵan úndi kınofestıvali Azııa jáne úndi kınosynyń konkýrstyq baǵdarlamalaryn qamtıdy, sondaı-aq, festıvaldiń «Álemdik panorama» syndy konkýrstan tys baǵdarlamasy sheńberinde FIPRESCI jáne NETPAC júldeleriniń jeńimpaz fılmderiniń kórsetilimi uıymdastyrylady. Jyl saıyn festıvalge 50 elden 200-den astam fılm qatysady.
Esterińizge sala keteıik, «Qazaq handyǵy. Altyn taq» tarıhı kartınasy - «Qazaq handyǵy» telehıkaıasynyń ekinshi maýsymynyń kıno nusqasy. Bul aýqymdy tarıhı joba Uly dala úshin kúres jáne qazaq memleketiniń qurylýy týraly baıandaıdy. Tarıhı kıno dılogııasy Ilııas Esenberlınniń «Kóshpendiler» trılogııasyndaǵy alǵashqy «Almas qylysh» romanyna negizdelgen.
Fılmdi Qazaqstan Respýblıkasy Mádenıet jáne sport mınıstrliginiń tapsyrysymen Sh.Aımanov atyndaǵy «Qazaqfılm» kınostýdııasy Centaurus Rustem Abdrashev production kompanııasymen birigip túsirdi.