Búgin «Astana jastary» volonterleri Alǵys aıtý kúnine oraı «Biz birgemiz» aksııasy aıasynda Transfýzıologııa ǵylymı-óndiristik ortalyǵynda qan tapsyrdy. Bul týraly qala ákimdiginiń resmı saıty habarlady.
Qaıyrymdylyq sharasyna 70 astanalyq volonter qatysty. Solardyń biri - Aıan Ermentaev. Erikti osymen besinshi jyl qatarynan donasııaǵa qatysyp jatyr. Olardyń árqaısysy 450 ml qan tapsyrdy.
«Elordalyq jastar «Biz birgemiz» aksııasy aıasynda toptasa otyryp, ardagerlerdiń, jalǵyz basty analar men zeınetkerlerdiń aýlasyn qardan tazalaýdan bólek, turaqty turde donor retinde qan tapsyrý sharasyna qatysady. Bir donor - bir ómir demekshi, bizdiń ıgi isimiz kóptegen adamdardyń ómirin qutqarýǵa septigin tıgizedi dep oılaımyn. Osy kómektiń arqasynda biz bireýdiń anasynyń, ákesiniń, balasy men baýyrynyń ómirin saqtap qalamyz. Biz osy áreketimizben azamattardy qan tapsyryp, kómek kórsetýge shaqyramyz. Ár adam osyndaı qıyn jaǵdaıǵa tap bolýy múmkin», - dedi ol.
Aıta keteıik, qys bastalǵannan beri volonterler ardagerlerge, zeınetkerler men jalǵyzbasty analarǵa aýlalaryn tazartýǵa qoldaý kórsetip keledi. Alǵys aıtý kúnine oraı «Ardagerlerge myń alǵys» jobasy aıasynda ardagerlerge azyq-túlik sebetterin taratýda.
Transfýzıologııa ǵylymı-óndiristik ortalyǵynyń dárigeri Aıdos Kenjınniń aıtýynsha, ortalyqqa kúnine 100-ge jýyq adam qan tapsyrýǵa keledi.
«Bizdiń ortalyqqa kúnine 100-ge jýyq adam donor retinde qan tapsyrady. Sońǵy eki jylda donasııaǵa qatysýshy adamdar sany kóbeıdi. Atap aıtsaq, 2018 jyly 34 myńǵa jýyq, al 2019 jyly 35 myńǵa jýyq adam qan tapsyrdy. Medısınalyq tekseristen ótken adamnan standart boıynsha 450 ml qan 10-12 mınýtta alynady. Sodan keıin qan quramy zerthanalyq tekseristen ótip, karantınge jiberiledi. Biraq bir aıdan keıin donor múmkindiginshe qaıta kelip qan tapsyryp ketkeni durys», - dedi ortalyq dárigeri.
Aıta ketsek, aksııaǵa qosylǵysy keletin turǵyndar qan tapsyrar aldynda ishimdik, shylymnan bas tartyp, medısınalyq dárilerdi qabyldamaǵan jón. Sondaı-aq donasııa kúni jeńil túrde tamaqtanýy qajet.