Kezdesýde Qasym-Jomart Toqaev pen Sýma Chakrabartı Qazaqstan men Eýropalyq qaıta qurý jáne damý banki arasyndaǵy qatynastardyń qazirgi ahýaly men yntymaqtastyǵynyń aldaǵy perspektıvalaryn, onyń ishinde birlesken ınvestısııalyq jobalardyń júzege asyrylý barysyn talqylandy. Bul týraly Aqordanyń baspasóz qyzmeti habarlady.
Taraptar koronavırýs indetiniń teris áseri jaǵdaıyndaǵy álemdik ekonomıkanyń damýy týraly pikir almasty.
Sýma Chakrabartı Qasym-Jomart Toqaevty Qazaqstan Prezıdenti qyzmetine kiriskenine bir jyl tolýymen quttyqtap, osy aralyqta elimizde atqarylǵan saıası jáne ekonomıkalyq reformalarǵa, ásirese, «Halyq únine qulaq asatyn memleket» tujyrymdamasyna joǵary baǵa berdi.
– Londondaǵy bas ofısimizdegi komanda men Qazaqstandaǵy ókildiktiń pikirinshe, Sizdiń bilimińiz ben halyqaralyq qatynastardaǵy mol tájirıbeńiz elińizdiń damýyna eleýli úles qosady. Biz Sizdiń barlyq bastamalaryńyzdy qoldaımyz, Prezıdent retinde bir jylda atqarǵan tabysty jumystaryńyzǵa rızashylyq bildiremiz, – dedi Eýropalyq qaıta qurý jáne damý bankiniń basshysy.