Elimizde jeke kásibin ashyp, óz isin dóńgeletkisi keletinder qatary jyl saıyn artyp keledi. Osy oraıda shaǵyn jáne orta bıznesti damytýǵa jáne qoldaýǵa baǵyttalǵan birneshe baǵdarlamalar júzege asyrylýda. Sonyń biri «Bastaý» jobasy. Osy joba arqyly bilim alǵan tálimgerler qaıtarymsyz qarajat ala bastady, dep habarlaıdy Mańǵystaý oblysy «Atameken» kásipkerler palatasynyń baspasóz qyzmeti.
Jyl basynan beri Beıneý aýdanynan 5 grant, Jańaózen qalasynan 30, Aqtaý qalasynan 10 grant utyp aldy. Atap aıtsaq , Aqtaý qalasynan alǵash ashylǵan «Mývı rým» antıkıno zaly. Jas kásipker Shynar Muhıtova bul kásiptiń túri qalamyzda bolmaǵandyqtan ashýdy sheshedi. Kásip ashýǵa 1 mln 300 myń shamasynda qarajat jumsalǵan sonyń 530 myńy grant. Kıno kórýge 14-40 jas aralyǵyndaǵy adamdar kele alady. Kıno zal 3 bólikten turady: 1 zalda 1-2 adam, 2 zalda 1-5 adam, 3 zalda 1-10 adam fılm kórýge múmkindikteri bar. Kirý quny 2 saǵatqa 3500 teńge.
Al Jańaózen qalasynan jas kásipker Álııa Kýlıeva «Eńbek» baǵdarlamasymen eń alǵashqy shaǵyn balalar oıyn saýyq ortalyǵyn ashty. Bul ortalyqtyń ereksheligi - balalardyń mı júıesiniń damýyna, oılaý qabiletiniń qalyptasýyna , shyǵarmashylyǵyn shyńdaýǵa yqpalyn tıgizedi. Munda 3-12 jas aralyǵyndaǵy balalar ýaqyttaryn qyzyqty ári paıdaly ótkize alady. Ortalyqtyń ishi zamanaýı qural-jabdyqtarmen jasaqtalǵan. Almaty qalasynan arnaıy tapsyryspen aldyrtyldy. Ata-analarǵa arnalǵan tamaqtaný oryn da qarastyrylǵan.
Sondaı-aq , jas kásipker Aınur Tilekqabylova Qaıtarymsyz qarajat 530 myń teńge utyp alyp , Beıneý aýdanynan kondıterlik ónim jasaıtyn seh ashyp , óziniń súıikti isimen aınalysyp otyr. Unnan jasalynǵan tátti tort, toqash, bálish ónimderin jasap shyǵarýda. Sehti ashýdaǵy maqsaty - halyqqa qol jetimdi baǵada táttilermen qamtamasyz etý. Táttilerdi pisirýge arnaıy peshter men tabalardy Almaty qalasynan tapsyryspen aldyrǵan. Qazirgi tańda aýyl sýpermarketimen shartqa otyryp kúnine bálish, samsa ónimderimen qamtamasyz etip otyr.
Aldaǵy ýaqytta Aqtaý qalasy boıynsha 60 grant, Jańaózen qalasyna 130, Munaılyǵa 50, Beıneý aýdanyna 45 , Mańǵystaý aýdanyna 35 grant, Túpqaraǵan 45 , Qaraqııa aýdanyna 35 grant bólý josparda bar. «Eńbek» baǵdarlamasy elimizdegi jumyssyzdardyń sanyn azaıtýǵa paıdasy mol kásip ashýǵa septigin tıgizip otyr.
Mańǵystaý oblysy