2020 jylǵy 4 naýryzda Qazaqstannyń Estonııadaǵy Elshisi Nurlan Seıtimov Estonııa Respýblıkasynyń eks-Prezıdenti (2001-2006 jj.), Estonııa Joǵarǵy Keńesiniń burynǵy tóraǵasy (1990-1992 jj.) A.Rıýıtelmen kezdesti. Bul týraly Syrtqy ister mınıstrliginiń baspasóz qyzmeti habarlady.
Kezdesý barysynda A.Rıýıtel Keńes Odaǵy kezindegi jáne eki eldiń táýelsizdiginiń alǵashqy qıyn jyldaryndaǵy Qazaqstan Respýblıkasynyń Tuńǵysh Prezıdenti – Elbasy N.Nazarbaevpen bolǵan kezdesýlerin jyly eske alyp, qazirgi Qazaqstannyń jetistikteri men bedelin atap ótti.
Elshi suhbattasýshyny Qazaqstandaǵy bolyp jatqan ekonomıkalyq jáne saıası ózgerister týraly habardar etip, qazaqstan-estonııa qatynastaryn damytý perspektıvalary jóninde pikir almasty.
Áńgime sońynda A.Rıýıtel Elbasyna, el basshylyǵyna jáne búkil qazaq halqyna izgi tilekterin jetkizdi, bizdiń memleketterimizdiń ekijaqty yntymaqtastyǵy odan ári nyǵaıa beretinine senim bildirdi.