Májiliste «Zań kómegin kórsetýdiń zańnamalyq negizderin jetildirý» taqyrybynda 13 naýryzda parlamenttik tyńdaý ótedi, dep habarlady Májilistiń baspasóz qyzmeti.
Depýtattar Memleket basshysy Qasym-Jomart Toqaevtyń Qazaqstan halqyna Joldaýyn jáne saılaýaldy baǵdarlamasyn, sondaı-aq jalpyulttyq «Birge» naýqany kezinde alynǵan usynystardy eskere otyryp, zań kómegin damytýdyń mańyzdy baǵyttaryn talqylaýdy maqsat etip qoıdy.
Parlamenttik tyńdaýǵa qatysýshylar azamattardyń quqyqtaryn qorǵaýdyń kepildikterin arttyrý, memleket kepildik bergen zań kómegin kórsetý júıesi jáne sot prosesine qatysýshylardyń básekege qabilettiligi men teńdigin qamtamasyz etý, sondaı-aq jan-jaqty áleýmettik-quqyqtyq kómek kórsetý júıesin jáne zań kómeginiń sapasyn qamtamasyz etý salasyndaǵy zańnamany jáne quqyq qoldaný tájirıbesin jetildirýge erekshe nazar aýdarýdy josparlaıdy.
Sonymen qatar otyrysta halyqty zań qyzmetterimen qamtý, zań kómegin kórsetý salasyndaǵy sıfrlandyrý, advokattar, notarıýstar, zań keńesshileri jáne jeke sot oryndaýshylarynyń qyzmetin jetildirý máselelerin talqylaý qarastyrylǵan.
Is-sharaǵa depýtattarmen qatar Konstıtýsııalyq keńestiń, Joǵarǵy sottyń, Bas prokýratýranyń, Ulttyq qaýipsizdik komıtetiniń, Sybaılas jemqorlyqqa qarsy is-qımyl agenttiginiń, Ádilet, Ishki ister mınıstrlikteriniń ókilderi shaqyryldy.
Sondaı-aq tyńdaýǵa respýblıkalyq zańgerler kollegııasynyń, jeke sot oryndaýshylarynyń respýblıkalyq palatasynyń, respýblıkalyq notarıattyq palatanyń, úkimettik emes uıymdardyń, ǵylymı qoǵamdastyqtyń ókilderi jáne halyqaralyq sarapshylar qatysady dep kútilýde.
Parlamentik tyńdaýdyń qorytyndysy boıynsha usynymdar qabyldanady.