Qasym-Jomart Toqaev pen Dmıtrıı Medvedev eki memleket arasyndaǵy jan-jaqty strategııalyq seriktestiktiń qazirgi ahýaly men perspektıvalaryn qarastyrdy. Kezdesý barysynda halyqaralyq jáne óńirlik qaýipsizdikti qamtamasyz etý máselelerine basa mán berildi. Bul týraly Aqordanyń baspasóz qyzmeti habarlady.
Qasym-Jomart Toqaev Dmıtrıı Medvedevti joǵary laýazymǵa taǵaıyndalýymen quttyqtady.
–Sizdiń memlekettik qyzmettegi baı tájirıbeńiz Reseıdiń memlekettiligin nyǵaıtý isine, ásirese qazir, elderińiz óz damýynyń jańa kezeńine qadam basqan kezde zor úles qosatyny sózsiz. Konstıtýsııalyq reformalardyń orny erekshe. Biz ony muqııat zerttep jatyrmyz. Árıne, biz odaqtas ári strategııalyq seriktes bolǵandyqtan, Qazaqstan oǵan aıryqsha qyzyǵýshylyq tanytady, – dedi Prezıdent.
Dmıtrıı Medvedev óziniń jańa laýazymda elimizge jasaǵan saparynyń sımvoldyq máni bar ekenin aıtty.
–Men munan dostyǵymyzdyń, odaqtastyǵymyzdyń sımvolyn kórip otyrmyn. Meniń sońǵy jyldary atqarǵan qyzmetterimdegi memlekettik saparlarym, eń aldymen, Sizdiń elińizge jasaldy. Bul bir-birimizdi jaqsy túsinýge, strategııalyq seriktestigimiz ben odaqtastyq qatynastarymyzdy nyǵaıtýǵa múmkindik beredi dep oılaımyn, – dedi Reseıdiń Qaýipsizdik keńesi tóraǵasynyń orynbasary.
Qasym-Jomart Toqaevqa Reseı Prezıdenti Vladımır Pýtınniń júrekjardy sálemin jetkizdi.
Dmıtrıı Medvedev Qazaqstan men Reseı arasyndaǵy yntymaqtastyq týraly aıta kele, onyń meılinshe mańyzdy damý kezeńinde turǵanyn atap ótti.
–Siz Reseıde júzege asyrylyp jatqan konstıtýsııalyq reformalarǵa nazar aýdardyńyz. Biz de Qazaqstandaǵy úderisterdi muqııat baqylap otyrmyz. Dostas, seriktes sanalǵandyqtan basqasha bolýy múmkin emes. Biz bir-birimizdiń damýymyzǵa kómektesip qana qoımaı, sondaı-aq, belgili bir deńgeıde ótken kezeńnen, damýymyzdyń keıbir sátterinen sabaq alýymyz kerek. Reseıdiń Qaýipsizdik keńesi tóraǵasynyń orynbasary retinde meniń kezdesýlerimniń buǵan septigi tııýi úshin tyrysamyn, – dedi Dmıtrıı Medvedev.
Sonymen qatar taraptar óńirlik jáne halyqaralyq kún tártibindegi ózekti máseleler jóninde, sonyń ishinde koronavırýs indetiniń taralýyna qarsy kúresý úshin qabyldanyp jatqan sharalar týraly pikir almasty.