Búgin Qazaqstan Prezıdenti Qasym-Jomart Toqaev Úkimettiń jáne Memleket basshysyna tikeleı baǵynyshty organdardyń jetekshilerimen keńes ótkizdi. Onda álemdegi qarjylyq-ekonomıkalyq ahýal jáne onyń Qazaqstan ekonomıkasyna áseri jóninde máseleler talqylandy. Bul týraly Aqordanyń baspasóz qyzmeti habarlady.
Prezıdent Úkimetke, Ulttyq bankke jáne basqa da memlekettik organdarǵa birqatar naqty tapsyrma berdi. Basty tapsyrma – memlekettiń halyq aldyndaǵy barlyq áleýmettik mindettemelerin tolyq kólemde oryndaý.
Qasym-Jomart Toqaevtyń tapsyrmasy boıynsha, Premer-Mınıstrdiń tikeleı basshylyǵymen Shuǵyl áreket etý shtaby quryldy. Daǵdarysqa qarsy is-qımyldar jospary ázirlenedi, iri kásiporyndarda halyqty jumyspen qamtýǵa qoldaý kórsetý jóninde arnaıy jospar daıyndalady. Prezıdent halyqty múmkindiginshe kóbirek jumyspen qamtý máselesin asa mańyzdy dep sanaıdy.
Úkimet 2020-2022 jyldarǵa arnalǵan respýblıkalyq bıýdjetti naqtylaý jóninde usynys engizedi.
Memleket basshysy bıýdjet shyǵyndaryn qysqartý, óńirlerde halyqty jumyspen qamtamasyz etý, elimizdiń qarjy-valıýtalyq naryǵyn turaqtandyrý, respýblıkalyq jáne jergilikti bıýdjetterdi ońtaılandyrý boıynsha sharalar qabyldaý qajettigin aıtty.