Premer-Mınıstr Asqar Mamınniń tóraǵalyǵymen ótken Úkimet otyrysynda eńbek jáne halyqty áleýmettik qorǵaý mınıstri Birjan Nurymbetov 2020 jylǵy qańtar-aqpan aılaryndaǵy eńbek naryǵyndaǵy ahýal týraly baıandap berdi. Bul týraly Premer-Mınıstrdiń baspasóz qyzmeti habarlady.
«Búgingi talqylanyp jatqan ahýal aıasynda Úkimet azamattardy áleýmetttik qamsyzdandyrý boıynsha barlyq áleýmettik mindettemelerin tolyq kólemde oryndaıtyn bolady. 2020 jylǵa memlekettik bıýdjette 4 mln-nan astam áleýmettik tólemder alýshylarǵa 3 377 mlrd teńgege jýyq qarjy qarastyrylǵan», — dedi B. Nurymbetov.
Zeınetaqy men járdemaqy alýshylardyń satyp alý qabiletin saqtaý maqsatynda 2020 jylǵy 1 qańtarynan ınflıasııa deńgeıin eskere otyryp barlyq áleýmettik tólemder 5%-ǵa ósti, onyń ishinde zeınetaqy mólsheri 7%-ǵa, ıaǵnı ınflıasııadan 2%-ǵa ilgerilep arttyryldy.
«Syrtqy naryqta qalyptasqan jaǵdaıdy eskere otyryp, halyq úshin múmkin bolatyn saldaryn jeńildetý maqsatynda barlyq áleýmettik tólemderdiń mólsheri ınflıasııa deńgeıine sáıkestendiriletin bolady», — dedi mınıstr.
Onyń aıtýynsha, qazirgi jaǵdaılarda halyqty jumyspen qamtý boıynsha barlyq sharalar qabyldanady, onyń ishinde «Eńbek» memlekettik baǵdarlamasynyń áleýeti qosa alynǵan.
Aǵymdaǵy jyly jumyspen qamtý sharalarymen 735 myń adamdy qamtý josparlanyp otyr. Baǵdarlamada daǵdarysqa den qoıý boıynsha barlyq sharalar kózdelgen, olar: jumyssyzdardy, onyń ishinde qysqartylatyn jumyskerlerdi qosa, qaıta oqytý, jeńildetilgen nesıeler men mıkro bıznesti damytý úshin granttar berý, sýbsıdııalanatyn jumys oryndaryna ornalastyrý.
Osy sharalardy iske asyrýǵa memlekettik bıýdjetten aǵymdaǵy jylǵa 123 mlrd teńge kózdelgen
Eńbek naryǵyndaǵy turaqtylyqty qamtamasyz etý jáne jumyssyzdyq deńgeıiniń kúrt ósýine jol bermeý sharalaryn iske asyrý maqsatynda áleýmettik nysandardy jóndeý jáne eldi mekenderdi abattandyrý boıynsha ınfraqurylymdyq jobalardy iske asyrý jónindegi Jol kartasyn ázirleý josparlanǵan. Sonymen qatar, EHÁQM sýbsıdııalanatyn ýaqytsha jumys oryndarymen qamtýdy keńeıtýdi, jumystan bosaý múmkin jumyskerlerdiń kásiptik oqytýyn uıymdastyrýdy jáne mıkrobıznesti damytýǵa arnalǵan granttar sanyn arttyrýdy kózdep otyr.
Jumyskerlerdiń eńbek quqyqtaryn qorǵaý jáne jumyspen qamtylý deńgeıin saqtaý maqsatynda, jumyskerlerdi jumystan bosatýdy josparlaǵan kásiporyndarǵa kúndelikti monıtorıng júrgizý kúsheıtiletin bolady, ondaı jumyskerlerdi jumysqa ornalastyrý sharalary qabyldanady.
Kásiporyndarmen ekonomıka salalary arasynda jumyskerlerdiń basqarylatyn aǵyny boıynsha Jol kartalaryn, sondaı-aq jumys oryndaryn saqtaý boıynsha memorandýmdar jasasý jumystary jalǵasa bermek.
Eldegi táýekel sheńberinde júrgen barlyq kásiporyndar, birinshi kezekte jalaqy bereshegine jol bermeý maqsatynda aldyn alý baqylaýymen qamtamasyz etiletin bolady.
«Múddeli ortalyq jáne jergilikti atqarýshy organdarmen, "Atameken" UKP-men birlesip, 2020 jylǵa josparlanyp otyrǵan 431 myń jańa jumys ornyn qurýdy qamtamasyz etý boıynsha júıeli sharalar qabyldanady», — dep túıindedi B. Nurymbetov.