Nur-Sultanda Devıs Kýboginyń fınaldyq kezeńine shyǵý múmkindigi boıynsha qazaqstandyq jáne nıderlandtyq tennısshilerdiń arasyndaǵy tórt matchtan turatyn tartys aıaqtaldy. Qazaqstan quramasy Nıderland komandasyn 3:1 esebimen tize búktirip, aqtyq márege joldamany utyp aldy. Bul týraly qala ákimdiginiń baspasóz qyzmeti habarlady.
Aıta ketsek, Qazaqstan men Nıderland quramalary arasyndaǵy alǵashqy oıyn kúni 1:1 esebimen aıaqtalǵan edi. Al ekinshi matchta Tallon Grıkspýrmen kezdesýinde eki sette de Qazaqstannyń birinshi raketkasy Aleksandr Býblık jeńiske jetti. Ekinshi kúnniń birinshi matchynda Andreı Golýbev pen Aleksandr Nedovesov jetistikke jetse, kelesi matchta Aleksandr Býblık Robın Haaseden 7:6 (7:4), 6:1 (1 saǵat 18 mınýt) esebimen basym tústi.
«О́z minberimizde jeńisti julyp alyp, álemniń basty tennıs týrnırine joldama alý, osydan baryp úzdik debıýtpen shyǵý – armanymyz edi. О́z úıimizde eshkimge ese bermeıtinimizdi taǵy bir márte dáleldeı tústik. Elimizdiń arenasynda jetinshi matchty jeńispen aıaqtap otyrmyz», - dedi Qazaqstan quramasy kapıtany Iýrıı Shýkın.
Eske salsaq, 12 naýryzda Madrıdte Álemdik lıganyń jerebesi ótkiziledi. Ol jerebede Qazaqstan quramasy top boıynsha óz qarsylasyn biletin bolady. Al jarystyń ózi 23-29 qarashada Madrıdtegi «La Caja Magica» stadıonynda ótedi.