Darıǵa Nazarbaevanyń tóraǵalyq etýimen Qazaqstan Respýblıkasy Parlamenti Senatynyń Bıýro otyrysy boldy. Bul týraly Parlament Senatynyń baspasóz qyzmeti habarlady.
Qazaqstan Respýblıkasy Prezıdentiniń «Qazaqstan Respýblıkasy Joǵarǵy Sotynyń sýdıalaryn saılaý týraly» usynysy kún tártibindegi alǵashqy másele boldy. Prezıdent usynǵan kandıdatýralar boıynsha qorytyndylar daıyndaý Konstıtýsııalyq zańnama, sot júıesi jáne quqyq qorǵaý organdary komıtetine tapsyryldy.
Senat taǵaıyndaǵan Qazaqstan Respýblıkasy Konstıtýsııalyq Keńesi múshesiniń ókilettigin toqtatý jáne qyzmetinen bosatý, sondaı-aq Konstıtýsııalyq Keńes múshesin qyzmetine taǵaıyndaý kún tártibindegi kelesi másele boldy.
Otyrys barysynda Senat taǵaıyndaǵan Qazaqstan Respýblıkasy Ortalyq saılaý komıssııasy múshesiniń ókilettigin toqtatý jáne qyzmetinen bosatý máselesi odan keıin qaraldy. Konstıtýsııalyq zańnama, sot júıesi jáne quqyq qorǵaý organdary komıtetine osy kandıdatýra boıynsha tıisti qorytyndy daıyndaý tapsyryldy. Bıýro músheleri odan basqa Qazaqstan Respýblıkasy Parlamenti Senaty Tóraǵasynyń «Qazaqstan Respýblıkasy Ortalyq saılaý komıssııasynyń múshesi qyzmetine taǵaıyndaý týraly» usynýyn da qarady.
Bıýro otyrysynda Májiliste maquldanǵan zań jobalary komıtetterge bólinip berildi. Áleýmettik-mádenı damý jáne ǵylym komıteti elimizdiń keıbir zańnamalyq aktilerine eńbek jáne ana men balany qorǵaý máseleleri boıynsha túzetýler engizý jobalary boıynsha bas komıtet bolyp belgilendi.
Bıýro otyrysy barysynda 12 jáne 19 naýryzda ótetin Senattyń kezekti otyrystaryna daıyndyq talqylandy. Salalyq komıtetterdiń tóraǵalary otyrystarda qaraýǵa usynylǵan máselelerdiń daıyndyǵy týraly habardar etti.
Bıýro músheleri sondaı-aq Senatta Shyǵys Qazaqstan oblysynyń kúnin ótkizýdi de talqylady. Darıǵa Nazarbaeva Aımaqtar kúnderin ótkizýdiń basty mindeti – memlekettik baǵdarlamalardyń óńirlerdegi oryndalý deńgeıin aıqyndaý, halyqty tolǵandyratyn máselelerdi jergilikti bılikpen birlese otyryp sheshý joldaryn qarastyrý ekenin atap ótti.
Senat josparyna sáıkes bıylǵy 22 mamyrda «Qazaqstan Respýblıkasynda genderlik teńdik pen otbasylyq qundylyqtardy damytý» taqyryby boıynsha Parlamenttik tyńdaýlar ótkizý josparlanǵan bolatyn. Ony uıymdastyryp ótkizý Áleýmettik-mádenı damý jáne ǵylym komıtetine júkteldi.